Shillong, K’Lyngkot 02
Ka ad-hoc committee kaba pynïaid ïa ki kam ki jam jong ka Wrestling Federation of India (WFI), ha ka sngi Ba-ar ka la pynbna ïa 13 ngut ki rangïalympat ki ban mihkhmat ïa ka ri sha ka Zagreb Open ka ban long ha Croatia hadien ba la lah ban pynbeit ha kaba ïadei bad ka visa.
Kane ka lympung ïalehkai (world ranking) kaba nyngkong eh jong u snem kan long ha ka nongbah Croatia naduh 10 haduh 14 tarik mynta u bnai.
Kumba ka long mynta ka WFI ka dang hap hapoh ka jingpynïaid jong lai ngut ki dkhot jong ka committee ba la thup da ka Indian Olympic Association hadien ba na ka liang ka tnat ïalehkai jong ka Sorkar Pdeng ka la sospon ïa katei ka synjuk ba la lamkhmat da u Sanjay Singh na ka daw ka jingpynkheiñ ïa ki riti pynïaid kam jong ka synjuk.
Ïa kane ka ad-hoc panel la khlieh da u Bhupinder Singh Bajwa.
“Lyngba ka jingtuklar da ka tnat External Affairs, ki 25 ngut ki nongïalehkai ki la ïoh jingbit ban leit sha Zagreb hadien ba ki la lah ban pyndep ïa baroh ki jingdonkam ha kaba ïadei bad ka visa,” la ong u Bajwa ha ka sngi Ba-ar.
“Ka kynhun ka la ïakynduh jingeh ha kaba ïadei bad ka visa. Hynrei na ka liang ka tnat External Affairs ka la ïarap na ka bynta kane ka kynhun.”
U chairman ka ad-hoc committee u la ong ba u Secretary-General ka Croatian Wrestling Federation u Tin Bregovic u la phah ïa ka shithi khot sngewbha ïa ki 13 ngut ki nongïalehkai ïalympat, khyndai ngut ki coach lem bad lai ngut ki rephri.
“Ngi la shim khia ba kane ka kynhun ka dei ban poi sha Zagreb ha ka por kaba biang na ka bynta ban ïoh ïashim bynta ha ka lympung ïalehkai,” la ong u Bajwa.
“Ngi kyrmen skhem ba kitei ki 13 ngut ki nongïalehkai kin ïoh ban ïashim bynta ha Zagreb khnang ba kan plie lad ïa ki ba kin pynkhreh na ka bynta ka Asian Qualification tournament ka ban long ha u Ïaïong bad ka World Qualification tournament ka ban long ha Jymmang.”
Ki kyrteng ki nongïalehkai ha ka Men Freestyle ki long u Aman (57kg); Yash (74kg), Deepak Punia (86kg), Vicky (97kg) & Sumit (125kg). Ha ka Greco-Roman ki long u Gyanender (60kg), Neeraj (67kg), Vikas (77kg), Sunil Kumar (87kg), Narinder Cheema (97kg) & Naveen (130kg). Ha ka liang ki kynthei ki long ka Sonam (62kg) bad ka Radhika (68kg).
