Mawkyrwat, K’Lyngkot 02
Kum shi bynta ban burom bad ban nym pynjakhlia ïa ki um ki wah kum ka jingbret pathar ïa ki plastik bad kiwei kiwei, ka South West Khasi Hills Swimming Association ha ka 31 tarik u Nohprah 2023 ka la pynlong ïa ka jingïajngi miet ha ka por 11:45 mynmiet hashwa ban wan u snem thymmai ha Phot Mawpon, Mawkyrwat, South West Khasi Hills.
Ha kane ka jingïajngi miet la wan ban ïashim bynta da ki 18 ngut ki samla kynthei bad shynrang bad la ïoh ruh ban ot ïa u cake bad jingdwai na u President jong ka seng u Bah HS Diengdoh, Retired MCS Officer bad SDO Civil barim ka Ranikor Sub Division.
Ka seng ka ai khublei snem thymmai basuk bakmen ïa baroh bad ka ai ruh ka jingkyrkhu kyrdoh ïa ki 27 ngut ki nongjngi ki ban sa leit ïashim bynta ha ka Meghalaya Games ka ban sdang naduh 15 haduh 20 tarik mynta u bnai ha Tura.
