Gaza, Kyllalyngkot:
Ha kum kane ka por ba ka Israel ka la sdang ban kohnguh ia ka jingkyntu jong kiba bun ban sangeh noh ia ka thma, hynrei la ong ba ha ka sngi ba sdang jong u snem ba thymmai la iohi ia ki tup-ki man, ki liengsuiñ bad ki shipai thma ka Israel kiba leit ther bom bad iai bteng ia ka thma sha ki bynta Shathie jong ka Gaza naduh ka kylla step jong ka Sngi Nyngkong bad kumjuh ruh jong ka Sngi Ba-ar. kane ka long hadien ba ka Israel ka la pynbna ia ki jingthmu jongka ban phah mih noh ia ki shipai jong ka na Gaza hadien ba kiba bun ki tnat bad ki ri bapher ki la kyntu bad maham jur ia ka Israel ba kam bit ban pynshitom beiñ ia ki paidbah ka Gaza tang namar ka jingshun jong ka ia ki lehnoh Hamas kiba la leit hiar thma ia ka Israel ha ka 7 tarik u Risaw jong u snem 2023.
Watla katta, na ka liang jong ka Israel ka la pynpaw ba kam pat shym la kwah ban pynkut noh ia katei ka thma bad ka la ong ruh ba ka jingleit hiar thma sha Gaza kan dang bteng sa bun bnai.
Hynrei, ha kane ka sien shuwa ban mih u snem thymmai, uwei na ki heh ka Israel u la pynpaw khyndiat ba ka Israel ka la don jingthmu ban phah mih noh ia ki shipai jong ka na Gaza ha une u bnai hynrei kan iai bteng ban leit hiar thma bad ban pynlut ia ki dkhot ka kynhun lehnoh Hamas suki-suki uwei hadien uwei katba ki dkhot jong katei ka kynhun ki dang don.
Ki heh ka Israel ki la ong ruh ba ka jingthmu jong katei ka jingphah mih noh ia ki shipai na katto katne ki bynta jong ka Israel, ka long ban ailad ia ki paid nongshong shnong ba lui-lui jong ka Gaza ba kin ioh ka jaka rieh tngen katba ka Israel ka dang iakhun bad ki lehnoh Hamas sha kiwei pat ki bynta jong ka Gaza bad kumjuh ruh kan ai jingjah thait ia ki nong Gaza kiba la shu shong hapdeng ka jingsyier naduh ba jia ka thma hapdeng ki lehnoh Hamas bad ka Israel naduh u Risaw jong une u snem ba la lah.
