Shillong, K’Lyngkot 02
Ka kynhun ki nongïalehkai siat-khnam (Recurve) ki la mih na ka nongbah ha ka sngi Ba-ar ban leit ïashim bynta ha ka lympung ïakop jong ka 40th NTPC Sub-Junior National Archery Championship ka ban sdang naduh 4 haduh 12 tarik mynta u bnai ha Raipur, Chhattisgarh.
Kane ka kynhun hapoh ka lama jong ka Archery Association of Meghalaya (AAM) ka kynthup ïa saw ngut ki shynrang bad ar ngut ki kynthei.
Ha ka liang shynrang ki long u Amebalaker Wanñiang, Devraj Mohapatra, Vivek Sunar bad u Banpynskhem Lyngkhoi. Katba ha ka liang kynthei ki long ka Deisngidasuk Hoojan bad ka Aphilarusuk Lyngdoh. Ïa kane ka kynhun la ïalam da u Anush uba dei u coach jong ka SAI Training Centre Shillong.
Katei ka synjuk ka la sei ruh ïa ki nongsiat khnam jong ka Indian Round kiba kynthup ïa u Aiboklang Nongrum (SAI), Wanpynskhem Marweiñ (Mawkyrwat), Lajiedban-wan Nongrum (Mawkyrwat) bad u Rickyshan Ïawphniaw (Mawkyr-wat), katba ha ka liang ki kynthei ki long ka Daiaka Sohbar (SAI), Ishashreya Gogoi (SAI), Daphishisah Marngar (Nongstoiñ) bad ka Afida Kharsohphoh (Nongstoiñ).
Kane ka kynhun hapoh ka jingïalam u Bahaman Lyngkhoi (Archery coach DSYA William-nagar), kan mih na kane ka nongbah ha ka 8 tarik.
Hashwa ban jied ïa ki nongïalehkai kiba kynsai, na ka liang katei ka synjuk ka la pynlong ïa ka prokram jied nongïalehkai ha ka 8 tarik u Nophrah 2023 ha kaba la wan ïashim bynta da 45 ngut ki nongïalehkai kiba la wan ba Bagmara, Williamnagar, Nongstoiñ, Mawkyrwat, Ri Bhoi, Shillong bad Khliehriat.
Napdeng kitei ki 45 ngut ki khynnah, 4 ngut ki shynrang ki la don hapoh ka thup jong ka Recurve, katba ar ngut ki kynthei ki la don ha ka thup jong ka Indian Round. Te kumta saw ngut ki shynrang bad saw ngut ki khynnah kynthei kiba kynsai ki la shah jied ban mihkhmat ïa ka Jylla sha katei ka lympung.
Hashwa ba kine ki kynhun kin mih na ka nongbah, la wan ai khublei bad kyrkhu kyrdoh da u Bah Robinson Ryntathiang uba dei u Assistant Secretary AAM.
