Guwahati, Kyllalyngkot:
U Myntri Rangbah jong ka Assam u Himanta Biswa Sarma ha ka lah sngi U Blei, u la pyllait paidbah ïa 200 tylli ki bos AC Electric, ki ban sa treikam ha baroh ki bynta jong ka nongbah Guwahati lem bad ki thaiñ ba marjan. Ka sorkar jylla ha kaba ïadei bad kane hashwa ka la dep ban pyllait ïa 100 tylli ki bos CNG sha ki paidbah, bad ka jingwanrah ïa ki bos ilektrik ka long halor ka jingthmu ban pynkhuid ïa ka mariang bad ki sawdong-sawkun, la ong u Sarma ha ka jingai jingkren ha ka por ba la don ka prokram ba la pyllait ïa kine ki bos.
“Ka jingkylla jong ka suiñ bneng ka la long kawei na ki jingeh kiba mih ha kaba ka pyrthei ha kane ka por ba mynta ka ïakynduh jingeh, bad ka jingpyllait ïa kine ki 200 tylli ki bos ilektrik, ha ka sngi kaba sdang jong u snem thymmai ka buh jingkyrmen ban wanrah jingkhuid ïa ka nongbah,” u la ong.
U Myntri Rangbah u la ong ba lada don ki kynhun jong ki riewshimet kiba mih shakhmat na ka bynta ban buh ïa ki jaka ban Charge ïa ki bos, ka sorkar Assam kan pynbiang ïa ki jingdonkam kumba dei rukom. U Sarma u la ong ba ka sorkar jong u ka la shim ïa ki sienjam ba bun ban khanglad ïa ka jingjaboh ka mariang, ha kaba ka jingkhuid kan sa sdang ban treikam hapoh ki saw bad san snem. U la pyntip ba ka jingpyntreikam ka dang ïaid shakhmat na ka bynta ban buh ïa 2,000 tylli ki CCTV Camera ha kylleng ka nongbah.
