New Dehi, Kyllalyngkot:
Ha ka nongbah Delhi, ki la don kumba 26 tylli ki rel kiba la sangeh pyntreikam hynnin ka sngi namar ka jingjur jong ka jingkahdum jong u lyoh, la ïathuh ki heh nongpynïaid jong ka Indian Railways.
Katkum ka jingïathuh jong ka tnat ba dei khmih ïa ka jinglong ka suiñ bneng la ong ba kane nongbah ha ki hynñiew sngi ban wan kan sa nang jur ha kaba ïadei bad ka jingkhriat ka ban poi sha ka 19 Degree Celsius ha ka 7 tarik, Kyllyngkot.
Ha kawei pat ka bynta, ka jingjur jong ka jingkhriat ha ka nongbah kumba la khmih lynti kan sa nang jur ha kaba ka la sdang naduh hynnin ka sngi da 9 Degree Celsius bad ha ka 6 tarik, Kyllalyngkot. Ka jingjur jong ka jingkhriat kan sa nang bteng ha baroh ki bynta jong ka Punjab, Haryana, Uttar Pradesh bad North Rajasthan na ka bynta ki sngi ban wan bad ba kan sa nang jur katba nang mih ki sngi, la ïathuh ka tyllong khubor kaba la wan na ka tnat ba dei khmih. Ka jingdon jong ka jingkahdum jong u lyoh kan sa nang ïai bteng ha baroh ki bynta ba shaphang Shatei-Sepngi bad ka bynta ba shaphang Mihngi jong ka ri ha kine ki khyndiat sngi ban sa wan ha kaba kan sa nang jur.
Ha Punjab, ka jingkahdum jong u lyoh kan sa bteng ha ki katto katne ki bynta haduh ka 5 tarik, Kyllalyngkot. Ha ki bynta ba marpdeng jong ka ri, ka jingjur jong ka jingkhriat ha ka por mynmiet kan sa sdang naduh ka 5 tarik, haduh ka 11 tarik, Kyllalyngkot. Ka jingkhriat ha ka por mynsngi ruh kan sa nang jur, khamtam ha ki bynta jong ka Madhya Pradesh, ki bynta jong ka Maharashtra bad Uttar Pradesh.
Shuh shuh ka India Meteorological Department ka la ïathuh lypa ruh da kaba ong ba kan sa don ka jinghap jong u slap ha ki katto katne tylli ki jaka kum ha ki bynta ba shaphang Shathie jong ka Tamil Nadu, ha ki bynta ba shaphang Shathie jong ka Kerala bad ka Lakshadweep na ka bynta ki 3-4 sngi.
Ka tnat ba dei khmih shuh shuh ka la ong ba ka jinghap jong u slap kan sa don ruh ha baroh ki bynta jong ka Madhya Pradesh bad ka Chhattisgarh naduh ka 2-5 tarik, Kyllalyngkot.
