Seoul, Kyllalyngkot:
Ha ka Sngi Ba-ar, u nong-ialam ka liang pyrshah na South Korea- u Lee Jae-myung u la shah ot-ryndang katba u dang ai jingkren sha ki nongthoh khubor hapoh ka nongbah Busan ha katei ka step.
La ong ba hadien ka jingleit jurip jong u sha ki bynta jong ka Kad Liengsuiñ ha katei ka nongbah, u Lee u dang ai jingkren sha ki katto- katne ki nongthoh khubor ha kaba kynsan uwei u briew u la leit tur hakhmat jong u bad u la ioh ban ot da ka tari na ryndang jong u ha katei ka por.
Utei u nongialam ka liang pyrshah u la don 59 snem ka rta bad u la kyllon iapler hajuh tang mar ia shah ot ryndang ha katei ka sngi. Kumta la pynkit noh ia u mar-mar sha ka jaka sumar kaba don hajan eh khnang ban pynïoh ia ki jingsumar kiba kloi ha ka por kaba biang.
Ha katei ka jingjia, la iohi ruh sa ia uwei pat u briew uba la iarap ban set da ka jaiñ rumal na ryndang jong u Lee ban tehlakam ia ka snam kaba synreit na u ryndang hadien ba la dep shah ot ha utei u runar ha katei ka por.
Ha katei ka jingjia, la ong ba utei u nongialam u dang iaid lynti ban leit sha ka kali jong u ha ryngkat ka jubab ba u ai ia ki jingkylli ba la buh da ki nongthoh khubor, hynrei ha mar katei ka por la ong ba utei u runar u la mih kynsan bad pan ia ka jingsoi ‘Signature’ jong utei u nongialam, ha kaba u la sei kynsan da kawei ka kynja tiar kaba kum ka tari bad u la ot wak na ryndang jong u Lee ha katei ka por.
Tang mar kumta hi utei u runar u la ioh phet noh bak namar ka jingkyndit bad jingshoh tyndep jong kito kiba don ha katei ka jaka bad hangta hi ki la pynkit noh ia utei u nongialam sha ka jaka sumar da ka liengsuiñ ‘Helicopter’.
