Imphal, Kyllalyngkot:
Ka sorkar Manipur ha ka lah sngi U Blei ka la pyntreikam biang ïa ka Curfew ha Thoubal bad Imphal West distrik hadien ba ka la jia ka jingïakynad bad ka jingïaumsnam ha ki bynta ba shaphang Shatei jong ka jylla.
Ka jingïakynad ka la jia hapdeng ki riewkieng atiar ki bym shym la lah ban ithuh bad ki nongshong shnong ha ka thaiñ Lilong kaba don ha Thoubal distrik ha ka janmiet jong ka lah sngi U Blei, la ïathuh ka tyllong khubor.
Kumba la ïathuh ki pulit, la ong ba ki la don kumba saw ngut ki briew kiba la ïap ha ka por ba la don ka jingïakynad bad ïa ki metïap jong ki haduh ba la thoh ïa ka khubor ym pat lap satia.
Hadien ka jingïakynad, ki la don ki jingpyntreikam pyrkhing ha Thoubal bad Imphal West distrik.
“Namar ka jingdon biang jong ki jingïakynad ha ka distrik, bad khnang ban khanglad ïa ka jingnang bteng jong kum kine ki jingjia bad ban khanglad ruh ïa ka jingduh jong kiba bun ki mynsiem briew bad ki jingdon jingem, la pyndam noh ïa ka jingweng ïa ka Curfew bad la pynjari biang ïa ka naduh ka 31 tarik, Nohprah, 2023 ha baroh ki thaiñ jong ka Imphal West District,” la ong ka jingthoh ba la pyllait da ka jaka treikam u District Magistrate of Imphal West.
U Myntri Rangbah jong ka Manipur u N Biren Singh, ha ka jingkren jong u lyngba ka Video, u la buh ka jingkyrpad ïa ki nongshong shnong jong ka Lilong ba kim dei ban wanrah shuh ïa ki jingïakynad bad ban ïaleh katba lah ban wanrah ïa ka jingsuk bad ka jingjai-jai ha ka thaiñ.
Ha ka jingkren jong u, u la ong ba yn sa pynshitom da kaba tyngeh pyrshah ïa ki runar kiba la donkti ha kane ka kam leh donbor jong ki.
“Ka sorkar jylla ka la rai ba kan ym kheiñ sting ha kaba ïadei bad ka jingjia. Yn sa pyntreikam shuh shuh ïa ki pulit ha ka thaiñ khnang ban ïohkem ïa ki runar,” u la ong.
Kum ban shu pynkynmaw, la ong ba ka jylla Manipur ka la shah ktah jur naduh ba la jia ka jingïakynad naduh ka 3 tarik, Jymmang, 2023, hadien ba ka la don ka ‘Tribal Solidarity March’ ba la pynïaid da ki distrik ri lum jong ka jylla na ka bynta ban ïakhih pyrshah ïa ka jingdawa jong ka kynhun jait bynriew Meitei ban shah kynthup hapoh ka Scheduled Tribe (ST).
Ki jingïakynad ki la nang ïai bteng naduh katei ka por khamtam ha ka por jong ka jingshah pynkynriah ka shnong Kuki na kawei ka jaka ne khlaw sorkar ha kaba nangne ki la mih ki jingïakhih kiba rit hateng hateng.
