Agartala, Kyllalyngkot:
Ki la don baroh kumba 744 ngut ki briew kynthup ïa 112 ngut ki Rohingya, kiba la shahkem ha ki shipai BSF katba ki dang pyrshang ban rung beaiñ sha ki bynta jong ka ri na Bangladesh lyngba u International Border ha Tripura, la ïathuh ki heh shipai hynnin ka sngi. Kane ka jingdon jong kine ki briew ka la kiew bha ha ki lai snem ba la leit, ha kaba ka kynhun BSF Tripura Frontier ka la ïoh ban kem ïa 369 ngut ki nongwan rungtuh ha u snem 2022 bad 208 ngut ha u snem 2021, la ong u heh shipai.
“Ha u snem 2023, ki shipai BSF ki la ïoh ban kem ïa 744 ngut ki nongwan rungtuh bad napdeng jong ki, ki la don kumba 112 ngut kiba dei ki Rohingya, 337 ngut ki nong Bangladesh bad 295 ngut ki nong India. Ki Rohingya Muslim, ki dei kiba la shahkem na ka shnong Churaibari hajan khappud Tripura. Kane ka dei ka jingdon bun eh jong kiba rung beaiñ hapoh ka jylla ha ki lai snem ba la leit,” u la ong.
U la ong ba ki shipai BSF ki la ïoh ban kurup ïa shibun ki song jong ki jingdih pynbuaid, kiba kynthup ïa ka song jong ki dawai jyrhoh, ki Cannabis, Yaba Tablet bad Brown Sugar kiba la kot sha ka T. 41.82 klur. Ka jingwan rungtuh jong ki Rohingya ka la nang ïai bteng naba ki pulit ka Tripura ki la ïoh ban kem ïa 7 ngut napdeng jong ki. Nalor kane, la ïoh ban kurup ruh ïa ka ksiar kaba 4 kilo, la ïathuh shuh shuh u heh shipai.
Ha palat bun snem, ka kynhun BSF Tripura Frontier ka la shim ka jingkitkhlieh na ka bynta ban ïakhun pyrshah ïa ki nongshun, ban pynkhlaiñ ïa ka jingpahara ha ki bynta khappud bad ban khanglad ïa ka jingwan jia jong ki kam beaiñ nabar jylla ne bar ri, u la bynrap.
Ka Tripura ka dei ka jylla kaba la ïasam da 856 km u International Border bad ka Bangladesh.
