Shillong, K’Lyngkot 02
U Khalid Jamil u la shah thung kum u coach bathymmai ka Jamshedpur FC na ka bynta ki jingïakhun kiba dangsah jong ka aïom ïalehkai Indian Super League.
Kane ka la wan hadien ba kane ka klob ka la rai da ka jingïasngewthuh jingmut lang na ka bynta ban ïakhlad lok noh bad u Scot Cooper hadien ba ka la shah rem da 1-4 kol ha ka Odisha FC ha ka 29 tarik u Nohprah jong u snem 2023.
U Jamil u la lah ban pynpaw ïa ka jingtbit ha kaba u la lah ban pynurlong ban khur jingjop ha ka I-League na ka bynta ka Aizawl FC ha ka aïom ïalehkai 2016-17.
Hadien katei ka jinglah ban pynurlong, u Jamil u la long uwei na ki coach kiba paw ha kaba u la leit ban shimti kum u coach ïa ka East Bengal bad ka Mohun Bagan.
U Khalid u la shimti nyngkong eh kum u coach ha ka Indian Super League na ka bynta ka NorthEast United FC ha kaba u la long kum u khlieh jong ka skhlem ai jinghikai ha ka aïom ïalehkai 2019-20. Hadien ba u la shimti kum u coacb ba shipor ka NEUFC ha ka aïom ïalehkai 2020-21 ha kaba u la lah ban pynurlong ïa katei ka kynhun ban ïoh rung sha ka ‘playoffs’.
Kane ka kynhun ka la shah rem ha ka ATK Mohun Bagan ha ka semi final bad dei kane kaba la pynlong ïa u ban shimti kum u coach ba pura ïa kane ka kynhun ha ka aïom ïalehkai kaba bud.
Mynta ka kynti u Jamil un shimti kum u coach ka Jamshedpur. Watla ka JFC ka la khur ïa ka jingjop ha ka aïom ïalehkai 2021-22, hynrei ha ka aïom ba la lah kam shym la lah ban ïalehkai bha bad mynta ka la don ha ka kyrdan ba shiphew hadien ba ka la kamai 9 point na ki khadar sien ïakhun.
“Nga ai khublei ïa ki bor pynïaid jong ka klob kaba la plie ïa nga kane ka lad bad nga sngewkmen eh ban pynïasoh sha ka Jamshedpur. Ka thong ka jong ngi mynta ka long ban kyntiew biang ïa ka Jamshedpur sha ki kyrdan ba kham shakhmat, te kumta ngi donkam ban trei shitom met bad mynsiem ban pynurlong ïa ka thong,” la ong Jamil ha ka kyrwoh.
Kane ka long ka sien kaba nyngkong eh ia u Jamil ba un shimti ïa kane ka klob ha ka Super Cup ha kaba ka Jamshedpur kan iakhun nyngkong pyrshah ïa ka NorthEast United FC ha ka 10 tarik mynta u bnai ha Bhubaneswar.
