Shillong, K’Lyngkot 02
Ka Paris St Germain ka la soi ïa u rangïalehkai ‘dien na Brazil u Lucas Beraldo na Sao Paulo na ka bynta ka kontrak kaba san snem, la pynbna kane ka klob ha la lah sngi U Blei.
Une u rangïalehkai ba dang 20 snem u dei uba la ïalehkai na Sau Paulo ha ki lympung ïalehkai bapher bapher bad u la ïadon bynta ruh ban khur jingjop ha ka Copa do Brasil ha u 2023. U la ïoh ruh ban mihkhmat ïa ka Brazil ha ka kynhun ïalehkai U-20.
“Nga sngwkmen eh ban pynïasoh ïalade sha kane ka klob namar ka Paris Saint-Germain ka don ïa ka jingangnud ban nangjam shakhmat ha ki lympung ïalehkai bapher bapher. Kane ka long u mawjam uba kongsan eh ïa nga ha ka kam ïalehkai bad kane ka long kawei ka ban ïarap ïa nga ba ngan nangjam shaphrang,” la ong u Beraldo kat kum ka kyrwoh
Kumba ka long mynta ka PSG ka la long ka kynhun kaba la tam san point ha ka lympung ïalehkai jong ka Ligue 1 bad mynta ka dangpynkhreh ban ïakhun pyrshah ïa ka Toulouse ha ka final jong ka French Champions Trophy ka ban long ha ka sngi Balang.
