Shillong, K’Lyngkot 02
Ka kynhun ïalehkai Under-19 ka Jylla ka la lah ban pynkut da kaba wan ha ka kyrdan ba-ar ha ka (plate group) jong ka Cooch Behar Trophy 2023-24, katba ka Nagaland ka la long ka nongjop.
Ha ka jingïalehkai kaba la neh haduh saw sngi, ka la kut noh ha ka lah sngi U Blei ha Sovima hynrei ka Nagaland ka la khur ïa ka jingjop hadien ba ka la tam ha ka inning kaba nyngkong.
Hadien ba la jop ïa ka kynting pisa ha ka 29 tarik u Nohprah, ka Nagaland ka la ïalehkai bha naduh kaba sdang ha kaba ka la buh ïa ka thong da kaba kamai 275 run bad shah pynkhyllem baroh ki nongtied ha ka inning kaba nyngkong, hynrei ka Meghalaya ka la kamai 234/10.
Hynrei haba wan shimti ia ka inning kaba ar ka Nagaland ka la ïakhun tyngeh ha kaba ka la lah ban kamai 334/5.
Ki nongkawang bol ka Meghalaya kiba la lah ban ïalehkai bha ha kane ka lympung ki kynthup ïa u Shavian Blah bad u Angkit Tamang kiba la lah ban khur 26 bad 25 wiket ha ki hynñiew sien ïakhun, katba ha ka liang ki nongtied ki kynthup ïa u Pushkar Raj Singh uba la lah ban kamai ïa ka spah run ha ka semi final.
Ban ïoh rung sha ka final, ka Meghalaya ka la pyrshang ban ïalehkai bha watla ka la ïakynduh jingeh ha kaba sdang. Kane ka kynhun ka la ïakhaid bad ka Mizoram bad hadien ka la shah rem ha ka Nagaland ha kaba baroh ar kine ki jingïa-khun ki la long ha la ïing.
Hadien ka Meghalaya ka la ïakhun pyrshah ïa ka Sikkim, ha kaba la lah ban khur ïa ka jingjop da ar wiket. Hadien katei ka jingïakhun, ka Meghalaya ka la lah ban pynliem sa ïa ka Arunachal Pradesh ha ka semi final.
“Nga sngewkmen halor ka rukom ïalehkai kane ka kynhun ki rangïalehkai U-19 hadien ba ka la wanphai da ka jingjop ha ki ar tylli ki jingïakhun,” la pynpaw u President ka MCA u Nababrata Bhat-tacharjee hadien ka jingïakhun final.
“Kane ka kynhun ka la pyni ïa ka mynsiem iakhun lyngba ka jingshim khia da baroh ki rangïalehkai. Ki don katto katne ki rangïalehkai kiba la pyni ïa ka mynsiem ïakhun kaba ngin shym la poi pyrkhat bad kane ka mynsiem ïakhun ka la ïai neh haduh kaba kut.”
Te kumta na ka liang u Bhattacharjee u la ai khublei ïa baroh ki dkhot kiba la ïadon bynta na ka bynta ban pynurlong ïa ka Meghalaya ban jam shaduh ka final.
Shuh shuh utei u nongïalam ka MCA u la khmih lynti ba ka kynhun ki rangïalehkai U-16 kan ïalehkai bha ha ka final (plate group) jong ka Vijay Merchant Trophy ka ban sdang naduh ka sngi Balang ha kaba kan ïakhun pyrshah ïa ka Manipur ha Jamshedpur.
