Amaravati, Kyllalyngkot:
Ka YS Sharmila, kaba dei ka para jong u Myntri Rangbah jong ka Andhra Pradesh u Jagan Mohan Reddy, kan sa pynïasoh pura bad ka seng Congress ha ka 4 tarik, Kyllalyngkot.
Ka Sharmila ka long ruh ka nongseng bad ka President jong ka seng YSR Telangana Party. Kine kiei kiei baroh ki la long khyndiat sngi hadien ba ka seng Congress ka la jop ïa ka ilekshon Assembly ha Telangana, ha kaba ka la pynkut noh ïa ka jingsynshar jong ka seng Bharat Rashtra Samithi (BRS) ha ka jylla.
Ha kaba ïadei bad kane, ka Sharmila ka la khot pynlong da ka jingïalang ïa baroh ki nongïalam jong ka seng ha ka por 11 mynstep hynnin ka sngi, ha kaba ïadei bad ka jingïarai na ka bynta ka seng bad ki kam ki ban dang ïai bteng hapoh ka seng Congress.
Ka Sharmila ka la kyntait ban ïakhun ïa ka ilekshon ha ka 30 tarik, Naiwieng ha Telangana ban khanglad ïa ka jingïapait vote ka ban lah ban ai jingkyrshan ïa u Myntri Rangbah barim jong ka Telangana u K Chandrashekar Rao.
“Nga la ai ka jingkyrshan ïa ka seng Congress namar ba ka seng Congress ka la don ha ka bynta ban ïoh ïa ka jingjop ha ka jingïakhun ïa ka ilekshon Assembly ha Telangana,” ka la ong.
“U KCR um shym la lah ban pynurlong wat tang kawei ruh ka jingkular ba u la khlei sha ki paidbah ha ki samoi treikam jong u kiba 9 snem. Bad ka daw kaba don ka long ba ngam kwah shuh ba u KCR un dang bat ïa ka bor synshar. Ma nga kum ka khun jong u YSR nga ai ka jingkyrshan ïa ka seng Congress. Ha palat 55 tylli ki konstitwensi ngan sa lah ban pynïoh vote na ka bynta ka seng Congress,” la bynrap ka YS Sharmila ha ka jingkren.
