Guwahati, Kyllalyngkot:
Ka kynhun Central Bureau of Investigation (CBI) ka la buh ar tylli ki jingmudui ha ka ïingbishar jong u Chief Judicial Magistrate, Kamrup (M) ha Guwahati, pyrshah ïa san ngut kiba la shah kynnoh donkti ha ki ar tylli ki jingjia kiba la jia ha ka por ba la don ka jingïakynad kaba jur ha Manipur.
Ka kynhun CBI ka la buh da ka jingmudui ha ka 23 tarik, Nailar, 2023, da ka jingkyrpad jong ka sorkar Manipur bad shimti ban pynlong ïa ka jingtohkit ha kaba ïadei bad ka jingjia katkum ka jingujor ejahar ha ka No. 584 (7) 2023, kaba 8 tarik, Naitung, 2023, hashwa la buh jingmudui ha Imphal Police Station halor ka jingmudui pyrshah ïa uwei u khynnah uba dang poh rta.
Kumba la pynshisha, la ong ba ka la don ka jingmudui halor ka jingjah jong ka khun kynthei jong kawei ka longïing naduh ka 6 tarik, Naitung, 2023, bad la ong ba ka la shah rahbor ha uwei u khynnah samla halor ka jingthmu ba un ïathoh khlem ka mon jong ka.
Ha kawei pat ka liang, u kpa jong utei u khynnah samla ruh u la buh da ka jingmudui ejahar ha Lamphel Police Station, District Imphal West, ha ka No. 1009(7) 2023 kaba 19 tarik, Naitung, 2023, pyrshah ïa ki briew ki bym shym la lah ban ithuh kiba la kynnoh ba u khun jong u, uba la don ha ka rta kaba 17 snem, u la mih na ïing da ka kali ar shaka jong u ha ka step jong ka 6 tarik, Naitung, 2023, bad naduh kane ka por um shym leit phai ïing shuh.
Shuh shuh la pynshisha ba une u la shah rahbor. Da ka jingkyrpad jong ka sorkar Manipur, ka kynhun CBI ka la shimti ban pynlong ïa ka jingtohkit halor ka jingjia ha ka 23 tarik, Nailar jong u snem 2023.
Ka jingtohkit ha kaba ïadei bad kine ki ar tylli ki jingjia kiba ïasyrïem ki la paw ba ha ka step jong ka 6 tarik, Naitung, 2023, une u samla u la leit sha ka jaka khreh kot jong kane ka khynnah, bad kit ïa ka ha ka kali ar shaka, bad leit sha Bishnupur, bad nangne u la leit sha Thas View Point Area ha Old Cachar Road.
Ha kane ka jaka, kine baroh arngut ki la shah rahbor ha ki runar kiba la shah kynnoh donkti ha ka jingjia, ha kaba ki la rah da ka bor ïa kine baroh arngut ha ka kali.
Kine ki runar ki la kit ïa ki baroh arngut sha ka jaka kaba kham kyndong, ha kaba hadien kane la suba ba ki la shah pynïap. Saw ngut ki briew kiba la shah kynnoh donkti ha ka jingjia ki la shahkem ha ka por ba la pynlong ïa ka jingtohkit bad kine mynta ki dang don ha kti jong ki pulit, la ïathuh ka tyllong khubor.
Ka kynhun CBI ka la buh da ka jingmudui ha baroh ar tylli ki jingjia pyrshah ïa kine ki san ngut kiba la shahkem, ka jingtohkit ha kaba ïadei bad ka jingjia ka dang ïai bteng.
