Ka All Parties Hill Leaders Conference (APHLC) ha u snem 1960 hapoh ka jingïalam u Capt. Williamson Sangma ka la pdiang ban thung (appoint) Chief Organiser of Volunteers Wing ïa I Maieid Hoping Stone Lyngdoh (ba la khlad). Da ki phew phew hajar ki la rung dkhot bad ki kam ki long ban ïarap ïa ki paradoh parasnam kiba ïa kynduh jingeh. Ki snem ki la nangïaid bad ha u snem 1966, ha ka Conference jong ka APHLC, kaba la long ha Mendipathar (Garo Hills) ka la beh seng ïa i Maieid Hoping Stone Lyngdoh, halor ka jingujor jong uwei u heh spah bar ri.
Haba la wan phai na Mendipathar i Maieid Hoping ryngkat bad ki saw ngut ki paralok, ki la thaw ïa ka Sub-Committee kaba i Maieid Hoping kum u President, i Bah Meshak Kharkongor (ba la khlad) Treasurer, Prof. Arister Basaïawmoit (ba la khlad) Adhoc Secretary bad Bah Tirispin bad Bah S.M. Jyrwa (kiba la khlad) kum ki Member. Ïa ka seng la jer kyrteng HSPDP. Ha ki snem 1968, ’69, ’70, ka seng ka la pyrshah jur ïa ki jingtyrwa jong ka sorkar India, kum (1) Scottish Pattern bad (1) Sub-State. Ki Volunteers ryngkat ki nongkyrshan, ha ka jingïalam jong i Maieid Hoping, ki la rah lama ïong ban pyrshah naduh 3 Mer Upper Shillong ter-ter sha jingkieng Umshyrpi tad haduh State Central Library, ha ka jingwan Shillong, ka Myntri Rangbahduh Indira Gandhi (ba la khlad) hashwa ka thma India – Pakistan, 1971.
Ka APHLC pat ka la pdiang ïa ka sub-State bad ka la jied bad thung ïa ki MLA shu sieh.
Da kaba ka la ïohi ïa ki phew phew hajar ki volunteer HSPDP bad ruh da ka ba pynsawa ha Lok Sabha da u MP jong ngi (ba la khlad), ha kito ki por ba ka don ka Khasi Regiment ha East Pakistan kiba pynlong ïa ka sorkar India ban shimkhia, mynjur bad pynbna syndon da ka Myntri Rangbahduh ïa ka ‘full-fledged state’ (Meghalaya) ha ka 21 tarik Kyllalyngkot, 1972 ha Madan Polo Shillong.
Da kaba burom bad sngewieit ïa i Bah B.M. Lanong, iba la kynthoh ha ka kot khubor, U Nongsaiñ Hima, 25 tarik Naiwieng, 2023, ïa ka seng HSPDP, la sngewdei ban pashat jingmut ba in sngewbha ban nym kynthoh ruma da kaba shu mutdur bad haba ruh im shym la long u dkhot (member) lymne u nongkyrshan HSPDP bad da kaba shu ñiat ba ïoh jingtip na ki ‘riew rangbah ba donburom ba la khlad, khlem da wad ïa ki jingtip ba shisha, ka long kaba ktah ïa ka histori jong ka jylla bad jong ka jaitbynriew. Shano yn leit ïa wad bad kylli? Balei im kynthoh ha ki por ba kito ki dang im? Shuh shuh, da kaba burom eh bad sngewieid ïa i Bah Stan, iba la trei kum u Asst. Revenue Officer ha ryngkat bad i Bah M.S. Jahrin (ba la khlad) kum u Revenue Officer, K.J. Hills District Council, i la iehnoh ïa ka kam (resign) hashwa ka ilekshon MLA 1972, pynïasoh bad ka HSPDP, ïaleh ilekshon bad jop na Mawlai Constituency.
Shuh shuh, ha ka ilekshon jied MLA ba nyngkong eh jong ka Meghalaya, ka APHLC ka la pynïeng kyrtong 7 na Parïong Constituency (uwei u kyrtong seng bad 6 ngut ki bula kyrtong (Dummy Candidate) ban pynksan ïa ka jingbeh seng jong ka, ban pyrshah bad ban pynkhyllem ïa i Maieid Hoping. Hai re hai, haba la pynbna ‘result’, duh ‘security’ (forfeited) baroh 7 ngut.
Ka pynkut : U President, General Secretary bad ki Executive Member jong ka seng HSPDP ki dei ban ïa shimkhia halor ki kam kiba ktah matïong ïa ka seng khamtam eh kaba ktah ïa ka burom ka ijot u khlieh Nongïalam Rangbah (Maieid Hoping), uba la long u nongseng ïa ka seng bad u kpa ka West Khasi Hills. Kyntang ïawai, kito ki ‘riew rangbah, ki ‘riew kynthei, kiba don ha kito ki por bad kiba dang im mynta, ki dang ïa kynmaw ïa kiei kiba la jïa ha kito ki snem (1960 ter ter haduh 1972).
Kumne keiñ, ban shu kynthoh kulmar bad tare ruma, shu shah kren toh-hoh, shah rkhie beiñ bad shah kynshi ei ha ki kynthei ki khynnah.
Da L. Lyngdoh
