Kyiv, Kyllalyngkot:
Ki bor pyniaid ka Ukraine ha ka Sngi Ba-ar ki la pyntip ba ka Russia ka la sdang ther bom biang sha Ukraine da kaba phah ia ki drone ban leit hiar thma bad ther bom sha ki jaka ba shong briew ha Ukraine, ha kaba la ïohsngew ia ka sur jingsawa jam na ka jingbthei ha kawei na ki thaiñ jong ka nongbah Kyiv ha katei ka step Sngi Ba-ar bad kumjuh ruh la ïohsngew ia ka jingriew ki ‘siren’ kiba phah jingmaham ha ki katto katne ki nongbah jong ka Ukraine.
U heh ka Ukraine napoh ka nongbah Kyiv, u Vitali Klitschko u la pyntip ba ka don ka jingbthei kaba sawa jam hapoh jong katei ka nongbah tang hadien katto katne kynta ba la iohi ia ki drone jong ka Russia kiba leit rung sha katei ka nongbah ha katei ka step.
Kumta la iathuh ba la iohi ia kawei ka ïingmala ba la julor bad twa hapoh jong ka distrik Desnyansky bad la ong ruh ba ki bor pyniaid ki dang bthah ia ki kynhun iarap ba kin leit ban khmih bniah ia ka jinglong- jingman ha katei ka jaka bad ban ioh ban pynbit pynbiang ia ki jingdonkam baroh.
La iathuh ruh ba ka Ukraine ka la ïohsngew ia ka jingriew jong ki tiar ba ju ai jingtip lane ki ‘Siren’ kiba ju maham haba don ki kynja tiar ne ki liengsuiñ kiba wan her ne wan rung shapoh u pud- u sam jong ka ri bad ia kitei ki siren la ïohsngew ha ki bun tylli ki nongbah jong ka Ukraine kynthup ia ka nongbah Kyiv, Chernigiv, Cherkasy, Mykalayiv bad kumjuh ruh ha ki bynta jong ka nongbah Kherson ha ka por kumba 3:30 jong katei ka step Sngi Ba-ar.
Ha katei hi ka step, ka tnat iada jong ka Ukraine ka la pyntip ba la iohi ia 9 tylli ki liengsuiñ pynhap bom Tubpolev Tu-95MS jong ka Russia kiba wan na ki bynta North jong ka Ukraine.
Ka jingleit thombor jong ki drone na Russia ha katei ka Sngi Ba-ar, ka long ruh hadien ba u President ka Russia- u Vladimir Putin u la pyntip ba ki shipai ka Russia kin nang pynjur ia ka jingleit hiar thma sha Ukraine bad ka long ruh hadien ba ka Ukraine ka la leit thombor khlem sangeh sha ka nongbah Belgorod jong ka Russia ha ka taiew ba la lah.
Katei ka jingleit thombor jong ka Ukraine sha Russia ha ka Sngi Saitjaiñ ka la shim ia ka jingim jong 25 ngut ki briew, kynthup ia 5 ngut ki khyllung- khynnah.
Kumjuh ruh na ka liang ka Russia, ka la leit ther bom kylla ia ka Ukraine ha ka sngi ba nyngkong eh jong une u snem 2024.
