Ka Hynñiewtrep National Liberation Council (HNLC) ka la pynbna ha ka 3 tarik Kyllalyngkot, 2024 ba ka la weng noh na ka jingïakren ïasuk bad ka Sorkar India bad Sorkar Meghalaya hadien ba ym shym la pdiang ïa ki jingdawa jong ka seng. Dei ha u Rymphang 2022 ba ka HNLC ka la tyrwa ban ïakren ïasuk bad ka sorkar khlem da buh kyndon, bad ka sorkar Meghalaya hapoh ka jingïalam jong u Conrad K Sangma ka la pdiang sngewbha ïa kane. Na ka liang ka HNLC ka la thung ïa u President ka Hynñiewtrep National Youth Front (HNYF), Bah Sadon Blah, ban long kum u nongmihkhmat ka seng ha ka jingïakren katba ka Sorkar India bad Sorkar Meghalaya ki la thung ïa u AK Mishra bad u Bah Peter S Dkhar kum ki ksiang. Hashwa ban sdang ka jingïakren bapura (Formal Peace Talks), ka la don ka jingïakynduh hapdeng ki ksiang bad ki nongïalam ka HNLC. Ka sien banyngkong ba ki nongïalam ka HNLC ki la sdang ïa ka jingïakren bapura bad ka Sorkar India bad Sorkar Meghalaya ka dei ha ka 24 tarik Jylliew, 2023.
Hapdeng jong ka jingïakren ïasuk, ka HNLC ka la pynbna ba u Vice-Chairman ka seng, uba la ïalam ïa ka kynhun ban ïakren, u Manbhalang Jyrwa, u la iehnoh kam, bad ha ka jaka jong u, ka seng ka la thung noh ïa u Teimiki Laloo. Ym tang katta, ka HNLC ka la pynpaw ïa ka jingpyrshah halor ka jingshah khot hajir jong ki nongïalam ha ki ïingbishar ha kaba ïadei bad ki mukotduma ba don pyrshah ïa ki, bad ki la dawa na ka sorkar ba ka dei ban weng noh shwa ïa kine ki mukotduma. Ka sorkar ka la pynpaw ruh ïa ka jingkwah jong ka ba u Chairman & Commander-in-Chief ka seng, u Bah Bobby Marweiñ lem bad u General Secretary & Publicity Secretary, u Bah Saiñkupar Nongtraw, ki dei ban wan lang sha ka miej jong ka jingïakren. Hynrei ka HNLC ka la kren shai ba katba ka sorkar kam pat weng ïa ki mukotduma pyrshah ïa u Bah Bobby bad u Bah Saiñkupar lane katba ym pat pynbiang ïa ka saiñdur jong ka soskular sangeh ïasiat, kine ki nongïalam kin ym wan shakhmat ban ïashim bynta ha ki jingïakren.
Hapdeng ka jingkyrmen ba ka HNLC bad ka sorkar kin poi sha ka jingïasngewthuh jingmut bad ka jingsuk, mynta ka sngi pat, u Bah Saiñkupar u la pynbna ïar ba ka HNLC ka la weng noh na ka jingïakren ïasuk bad kan bteng ïa ka jingïakhun lyngba ki ktang suloi. Kane ka jingpynbna jong u Bah Saiñkupar ka la pynkut noh shi syndon ïa ka jingkyrmen na ka bynta ka jingsuk. Ngim tip kaei ka ban jia ha ki sngi bad ki por ki ban wan lyngba kane ka jingweng jong ka HNLC na ka miej jong ka jingïakren ïasuk. Tangba lada ka HNLC ka sdang biang ïa ki kam ïaumsnam, ngi tip shai ba ka jingsuk kan jah rngai na kane ka jylla khamtam ha ka thaiñ Khasi Jaiñtia.
Ha kine ki snem kiba la leit noh, ngi la ïohi ba ka HNLC ka la donkti ban pynbthei bom wat haduh ha nongbah Shillong. Ki la long ki sngi kiba la pynsyier ïa kiba bun ba lang. Ka sorkar mynta kan leh kumno halor kane ka jingweng noh ka HNLC na ka miej jong ka jingïakren? Ka sorkar ruh ka sngewthuh shai ba lada ym lah ban ïakren bad ka HNLC, ki lah ban mih ki jingjia ki ban ktah jur ïa ka shongsuk shongsaiñ. Don napdeng jong ngi kiba dang kynmaw ïa kito ki sngi bad ki snem ba ki dkhot ka HNLC ki la kieng atiar bad leh ïa ki kam kiba la ktah ïa ka jingsuk. Ha ka jingshisha, ym don shuh ki ban dang kwah ban ïohi ïa kito ki sngi bad ki por. Hynrei haba ka sorkar kam pdiang satia ïa ki jingdawa jong kane ka seng, ka HNLC ruh ka sngew ba kam don jingmut ban bteng ïa ka jingïakren ïasuk.
Lehse ka sorkar Meghalaya kan sa nang pyrshang ban phah khubor sha ki nongïalam ka HNLC ba kin bteng ïa ka jingïakren namar kin don bun ki jingeh hadien habud lada ka sorkar kam pyrshang ban wanrah biang ïa ka seng sha ka miej jong ka jingïakren. Lada ka sorkar ka pulom, ngin sa nang mad jingeh ha ki sngi ki ban wan. Haba ka HNLC ka la dep ban wan shakhmat ban ai ïa ka kti kamon ka kti kadiang ban ïakren ïasuk, ka sorkar ka la dei ban nang kumno ban pynneh ïa kata khnang ba ka jingïakren kan ym long lehnohei. Mynta ngin hap ban ïa ap ïa kaei kaba ka sorkar kan don ban ong halor kane ka jingpulom noh ka jingïakren ïasuk tang hapoh hynriew bnai.
