Beirut, Kyllalyngkot:
Ki bor pyniaid ka Syria ha ka Sngi Ba-ar ki la pyntip ba 8 ngut ki la khlad na ka jingïasiat hapdeng ki bor pahara bad ki kynhun runar ha ka Sngi Nyngkong bad iwei na kitei kiba khlad i dei i khynnah rit. Kane ka la jia ha ka phang Northwestern jong ka Syria ha ka Sngi Nyngkong, ha kaba 19 ngut kiwei pat ki la mynsaw na katei ka jingjia.
Katei ka jingiakhun ka long hapdeng ki shipai jong u President ka Syria- u Bashar al-Assad pyrshah ia ki kynhun lehnoh Hayat Tharir al-Sham (HTS) kaba la lam khmat da u dkhot barim ka Al-Qaeda na Syria.
Ha katei ka jingjia la iathuh ba uwei u rangbah, ka longkmie bad ka khun rit jongka, ki la duh ei noh ia ka jingim, katba 10 ngut kiwei pat ki dei ki riew paidbah kiba la ngat bad mynsaw ha ka jingther bom jong kitei ki lehnoh HTS sha ki shnong jong ka Nubul bad Zahraa kiba hap hapoh ka jingkhmih jong ki shipai ka Syaia.
Ka HTS bad kiwei pat ki kynhun lehnoh ki ju synshar ia ka thaiñ Idlib bad ki thaiñ ba marjan jong ka Aleppo, ha kaba 3 ngut ki riew paidbah ki la duh ei noh ia ka jingim bad 9 ngut pat ki la mynsaw.
Kumjuh ruh na ka liang jong ki shipai ka Syria, ki la ther bom kylla sha ki jaka ba don kitei ki lehnoh ha ki thaiñ Darat Izza jong ka Aleppo, ha kaba 3 ngut ki riew paidbah ki la duh noh ia ka jingim ha katei ka jingther bom ki shipai ka Syria bad kumba 9 ngut ruh kiba ngat bad mynsaw ha katei ka jingjia.
Ka tnat khmih bniah jong ka Britain kaba ju treikam hapoh Syria, ka la iathuh ba katei ka jingther bom jong kitei ki arliang kynhun ka la leit dei bad pyn julor ia kawei ka karkhana pynmih jingbam, ka jakamane Muslim bad kawei ka shlem pynmih bor ding bad kumjuh ruh ka la pynjulor ia kawei ka jaka iadie- iathied kaba ju pynlong kum ka iew.
La ong ba ka jingther ‘namding jong ki shipai ka Syria ka la shim ruh ia ka jingim jong 2 ngut ki riew paidbah ha ka shnong Burj Haidar jong ka thaiñ Aleppo.
Ha ka taiew ba la leit, ka jingleit ther bom ki liengsuiñ ka Russia ha ka thaiñ Idlib, ka la shim ia ka jingim jong 5 ngut ki riew paidbah kiba dei na kajuh ka longiing, kynthup ia 3 ngut ki khynnah rit.
