Tokyo, Kyllalyngkot:
Ki bor pyniaid ka Japan ha ka Sngi Balang ki la pyntip ba ka jingdon jong kiba khlad na u jumai bah ba la khie ha katei ka ri ka la kiew sha ka 62 ngut ha ka Sngi Balang. Kane ka long hadien ba ki kynhun iarap ki la nang lap bad ioh sei shuh shuh ia kitei metiap kiba don ha katei ka jaka ba twa bad julor ki ïingmala bad ki jingtei bapher bapher hadien ba utei u jumai- bah u la leit ban lynshop ia ki katto katne ki thaiñ jong ka Japan ha ka sngi ba nyngkong jong une u snem 2024.
La ong ba ka Japan ka la ioh mad ia u jumai uba khlaiñ haduh kumba 7.5 Magnitude ha katei ka 1 tarik u Kyllalyngkot jong une u snem 2024, ha kaba ki bun tylli ki ïingmala ki la um bad julor lut bad wat ka surok ruh ka la kad arliang bad ka la ioh nguid ia ki kali kiba don ha surok ha ka por ba utei u jumai u la wan lynshop ia ka Japan ha katei ka sngi.
Ha katei ka sngi ba nyngkong jong u snem ba thymmai, ki la don haduh 150 tam ki jumai kiba la pynkhynñiuh ia ka Japan napdeng jong utei u jumai uba la kot ia ka 7.5 Magnitude ka jingkhlaiñ.
