Itanagar, Kyllalyngkot:
Ka leit ka wan ha ka nongbah Itanagar ka la shah ktah shi kat dei eh namar ka jingkhang jong lai tylli ki jaka ai umphniang kali ne ki Petrol Pump ha ka por ba dang don ka jingïakhih ha baroh kawei ka ri ba la khot pynlong da ki nongñiah kali kiba la ïakhih pyrshah halor ka jingpdiang ban pyntreikam ïa ka kyndon Bharatiya Nyaya (Second) Sanhita, 2023.
Kane ka jingïakhih ka long ban pyrshah halor ka jingnang pynjur ïa ka jingpynsaja ïa kito ki nongñiah kali kiba kum tynrah briew khlem leit ïathuh ne pyntip sha ki pulit halor ki jingjia.
Ki nongñiah kali kiba kynthup ïa ki nongñiah trok, ki nongñiah bos bad wat ki nongñiah bos sorkar ki la ïatylli lang ban ïashim bynta ha ka jingïakhih.
Kum shi bynta ban pyrkhat halor ka jingshah ktah jong ba bun ba lang, ki nongñiah kali ki la ïania da kaba ong ba ki jingpyntreikam pyrkhing kin sa ktah ïa ki khamtam ha kaba ïadei bad ka kam.
Kiba bun na kine ki nongñiah kali ki la pynshai da kaba ong ba kiba bun kum kine ki jingjia ha kaba ïadei bad ka jingkum tynrah briew ka dei na ki daw kiba bun, kaba kham kongsan kum ha kine ki por ka dei na ka daw jong ka jingkahdum jong u lyoh hapdeng surok, ki la ong shuh shuh ba ki nongñiah kali kim dei ban shah pyrkhing ne shah pynngat ha ki kyndon aiñ tang namar ba kim lah ban tehlakam ïa ki kali ba ki ñiah ha ki surok.
Ha kaba ïadei bad kane ka bynta, na ka liang ki bor sorkar ki la buh ka jingkyrpad bad kyntu ïa kine ki nongñiah kali ba ki la dei ban pynkut noh ïa ka jingïakhih jong ki khnang ban lah ban weng noh kham kloi ïa ki jingeh ba ki paidbah ki ïakynduh bad kumjuh ruh ban ïakren sngewthuh ha kaba ïadei bad ki jingïakynduh jingeh jong ki.
