Guwahati, Kyllalyngkot:
Ki la don kumba 151 ngut ki shipai Myanmar, kiba la phet ha ka por ba don ka jingïakynad bad ki kynhun kieng atiar, mynta ki la shah pynphai biang sha ka ri lajong ha ka sngi Ba-ar, la ïthuh u heh jong ka tnat shipai Assam Rifles.
Ïa kine ki shipai Myanmar la kit ha ka liengsuiñ jong ki shipai ka Myanmar Air Force na Aizawl beit beit sha Myanmar, la ong u heh shipai.
Kine ki shipai ki la tam ïa u pud u sam jong ka ri bad rung sha ki bynta ba shaphang Shathie jong ka Lawngtlai distrik jong ka jylla Mizoram ha ka 29 tarik, Nohprah hadien ba ki jaka treikam jong ki ki la shah thombor ha ka kynhun jong ki riewkieng aitar jong ki Arakan Army.
Ki shipai ka tnat Myanmar Army, ïa kiba la tip ruh kum ka ‘Tatmadaw,’ki la phet ha ryngkat ki tiar siat jong ki bad ki la leit sha Assam Rifles kaba don ha Tuisentlang ha Lawngtlai distrik hadien ba ki la dep ban ïasiat markylliang bad ki riewkieng atiar jong ka kynhun Arakan Army.
Kine ki shipai katei ka ri ki la ïoh ka jingïada kaba kyrpang na ki shipai Assam Rifles kaba don ha Parva ha Lawngtlai distrik hajan ka khappud Myanmar naduh katei ka por.
Ha u Naiwieng, ki la don baroh kumba 104 ngut ki shipai Myanmar kiba la leit phet sha Mizoram hadien ba ki jaka treikam jong ki shipai kiba don ha khappud Myanmar-India ki la shah leh donbor bad thombor ha ki kynhun ba kyrshan ïa ka synshar paidbah ka People’s Defence Force (PDF).
Kine ki shipai ki la shah kit ha ka liengsuiñ da ki shipai ka tnat Indian Airforce sha Moreh kaba don ha Manipur, ha kaba nangne ki la ïaid lyngba ka khappud International Border bad rung hapoh ka Tamu, ka jaka sor kaba don ha khappud jong ka Myanmar.
Ka kynhun kaba nyngkong jong ki shipai Myanmar kaba don kumba 40 ngut, ka la mih na ka shnong Hnahlan kaba don ha Champhai distrik ha ka 14 tarik, Naiwieng, katba ka kynhun kaba khatduh kaba don 30 ngut ki shipai ka la mih da ka liengsuiñ na Tuipang kaba don ha Siaha distrik ha ka 29 tarik, Naiwieng.
