Shillong, K’Lyngkot 03
Ka Manchester United ka lah ban pyllait ïa u Jadon Sancho ba un leit phai biang sha ka Borussia Dortmund da kaba shu ai wai mynta u bnai.
U Sancho u la kyntait ban panmap ïa u Erik ten Hag na ka daw ba u la kynthoh ha social media hadien ba u manager u la ong ba ka jingshah rem ha u Nailur ha ka Arsenal ka dei na ka daw ka jingbym ïalehkai bha ha ka prokram kilanmet.
Utei u rangïalehkai shapdeng na England ba dang 23 snem ka rta, u la kyntait ïa kane bad u la ong ba u la shah kynnoh khlem nongrim.
Hadien katei u la don lang bad ka kynhun ïalehkai bad ym shym la don kano kano ka jingpyrshah ïa u.
Ka United ka la thied ïa u Sancho na ka Dortmund ha ka bynta £73m ha u Naitung jong u snem 2021.
Lah ban sngewthuh ba katei ka kynhun ïalehkai jong ka Bundesliga ka la kwah ban tyrwa ïa u Sancho na ka bynta ban wanrah biang ïa u ha ka ïew ïathied rangïalehkai mynta u bnai bad ka lah ban don ïa ka jingïamynjur lang na ka bynta kaba sah jong ka aïom.
