Agartala, Kyllalyngkot:
Kawei ka kali kit nongpang ne ka Ambulance thok, ka la shah bat ha ki pulit, bad haba la khmih bniah na kane kali, la ïoh ban kurup ïa 53 song u Ganja ha Unakoti distrik, jong ka Tripura, la ïathuh ki heh pulit.
Kumba la ïathuh ki pulit, la ong ba ka kynhun jong ki pulit ka Kailashahar ki la ïoh ban kurup ïa kine ki jingdih pynbuaid ha kaba la antad ba u la kot sha ka T. 20 lak. U heh pulit u Feroze Mia bad ki nongïarap jong u ki la pynjur ïa ka jingpahara ha Kamranga, ha ka thaiñ Bari jong ka Kailashahar, haba ki la ïoh jingtip halor ka jingdon jong kane ka kali. Haba la ïoh jingtip halor ka jingdon jong kane ka kali kit nongpang thok, ka kynhun pulit ka la buddien bad beh thong nadien haduh ban da ïohbat ïa ka. Ha ka por ba la khmih bniah hapoh kane ka kali, la lap ïa kine ki song jong u Ganja. Ha kaba ïadei bad kane, u nongñiah jong ka kali u la ïohlad ban phet na katei ka jaka, la ïathuh ki pulit.
“Kumba la khmih bniah, ïa kine ki song jong u Ganja la thmu ban shalan sha kiwei pat ki jylla ha ka dor kaba kham rem,” la bynrap shuh shuh ki pulit. Ka la don ka jingbuh jingujor ha kaba ïadei bad ka jingjia bad ka jingtohkit jong ki pulit halor kane ka dang ïai bteng.
