Shillong, K’Lyngkot 03
U rangïalehkai kynjat bol na Algeria u Youcef Atal u la shah sospon haduh phra bnai ha ka ïingbishar na France na ka daw ka jingkynthoh beiñ niam ha social media halor ka jingjia ha Gaza.
Une u rangïalehkai ‘dien ba dang 27 snem ka rta, uba la ïalehkai na ka bynta ka kynhun ïalehkai Ligue 1 ka Nice, un hap ban siew ïa ka kuna kaba 45,000 euros ($49,000) na ka daw ba u la buh ïa ka jingkren lyngba ka video na ka bynta ka sngi kaba dum jong ki Jew.
Utei u rangïalehkai un hap ban siew ïa kiei kiei kiba u la pynmih ha ka Nice-Matin bad kumjuh ha kawei ka kot khubor ka Le Monde. Kane ka jingpynpaw ka la wan lyngba ka video jong u nongïalam niam, u Mahmoud Al Hasanat, ha kaba ki la don haduh 3.2-million ki nongpeit ha katei ka Instagram ha ki san sngi hadien ba ka jingthom bor ki Hamas ha ka 7 tarik u Risaw ïa ka Israel.
Hadien ba ka Israel ka la pyni bor kylla pyrshah ïa katei ka kynhun riew kieng atiar ha kaba ki la don kumba 22,000 ki mynsiem ki la duh ei ïa la ka jingim. Hadien ka jingpynpaw shaphang ka jingshah pynïap ki khyllung khynnah, u Al Hasanat u la ong ba u blei un sa pynlong ka sngi kaba dum na ka bynta ki Jew.
Te kumta ha katei ka por u Atal u la don hapoh ka ri jong u bad ka kynhun ïalehkai ka Algeria ha ka por ba u la pyllait ïa katei ka video. U la weng noh ïa katei ka video ha ka por ba ka Nice ka la maham jur ïa u namar ka lah ban mih ki kynrum kynram bad ka la dawa ba u dei ban panmap.
