Shillong, K’Lyngkot 03
Ka Birmingham City ka la weng noh ïa u Wayne Rooney kum u manager bad la pynkut ruh ïa u Carl Robinson (first team coach).
Kane ka jingshah weng ka jong ki ka la wan hadien ba katei ka kynhun ka la jop tang ar sien na ki 15 sien ïakhun jong ka Championship bad ban shah pynhiar na kaba hynriew shaduh kaba arphew.
Kat kum ka kyrwoh ba la pyllait da kane ka klob la ong, “Ka Birmingham City ka la ïakhlad lok noh bad u Wayne Rooney bad kumjuh u Carl Robinson.”
“Kumba ka long na ka jingmih na ka jingïalehkai kam shym la urlong kumba ka klob ka la khmih lynti. Te kumta ka klob ka la sngewdei ban kylliang ha ka rukom pynïaid na ka bynta ban wanrah ka jingkylla ha ka jingïalehkai phutbol.”
“Ki bor pynïaid ka klob ki la ïai pynkhreh ban wanrah ka jingkylla bad ban kyntiew biang ïa ka Birmingham City kum kiwei na ki klob kaba khlaiñ bor. Te kumta ka klob ka la ai khublei ïa u Wayne bad u Carl ki la noh synnñiang na ka bynta ban kyntiew ïa ka klob.”
Ha kawei pat ka kyrwoh ba la pyllait da u Rooney la ong, “Nga ai khublei ïa u Tom Wagner, Tom Brady bad u Garry Cook kiba la plie lad ba un shimti ban pynïaid ïa ka Birmingham City bad ruh ki jingkyrshan ha ka por ba u dangdon ha ka klob.”
“Ha nga hi shimet ka long ka jingsngew bynñiaw ban shah weng noh kum u manager ïa ka klob. Nga la don bynta ha kane ka kam kum u rangïalehkai lane kum u nongpynïaid naduh ba u dangdon ha ka rta kaba 16 snem. Mynta ngan pynlut por shwa bad ka ïing ka sem hashwa ba ngan pynkhreh ban leit shimti ïa kawei pat ka klob”.
“Nga kitbok ba ka Birmingham City bad kumjuh ïa ki nongpynïaid ba kan nangkiew shaphrang kumba ki angnud.”
Kum ban shu pynkynmaw u Rooney ba la 38 snem ka rta, u la shah thung ha ka por ba ka Birmingham ka la kiew sha ka play-off, hadien ba ka la kamai 18 point na ki 11 sien ïakhun ha ka Championship.
Hynrei ka jingbym lah ban kyntiew ka la pynlong ïa katei ka kynhun ban shah rem haduh khyndai sien, ha kaba ka la pynlong ïa ka Birmingham ban don ha ka jingma bad ka lah ban shah pynhiar kyrdan.
