Agartala, Kyllalyngkot:
Ha kawei pat ka jingthmu ban rung beaiñ shapoh ka ri India, ki la don arngut ki nong Bangladesh kiba la shahkem halor ka jingrung beaiñ jong ki sha ka ri lyngba u International Border ha Sabroom kaba don ha Sepahijala distrik jong ka Tripura ha ka janmiet jong ka sngi Ba-ar, la ïathuh ki pulit. Na ki arngut kiba la shahkem uwei u dei uba dang poh rta.
U Jewel Dhar (27) bad uwei u khynnah uba la 13 snem ka rta, kiba dei ki nongshong shnong jong ka Chittagong ha Bangladesh ki la shahkem na Baishnabpur Tillabari.”Uwei napdeng kine u la shah phah sha patok na ka bynta ka jingtohkit bad ïa uba dang rit rta la phah sha Juvenile Kome,” la ïathuh u heh pulit.
Shuh shuh ka tyllong khubor ka la ïathuh ba ki pulit ki la ïoh ruh ban kurup ïa ar tylli ki SIM Card, kawei ka dei kaba la ïoh na India bad kawei pat ka dei kaba na Bangladesh na kine baroh arngut. Ki shipai ïada khappud jong ka tnat Border Security Force ki la ïoh bam kem ïa 744 ngut ki briew kiba la rung beaiñ sha ki bynta jong ka khappud International Border ha ka jylla ha u snem ba la lah, kine ki kynthup ïa 112 ngut ki Rohingya, 337 ngut ki nong Bangladesh bad 295 ngut ki nong India ha ki jingpyntreikam bad ki jingkhynra ba bun. Kane ka jingdon jong kine ki briew kiba la rung beaiñ sha ka ri ka la kiew bha ha ki lai snem ba la leit, ha kaba ka kynhun BSF Tripura Frontier ka la ïoh ban kem ïa 369 ngut ki nongwan rungtuh ha u snem 2022 bad 208 ngut ha u snem 2021, la ong u heh shipai.
“Ha u snem 2023, ki shipai BSF ki la ïoh ban kem ïa 744 ngut ki nongwan rungtuh bad napdeng jong ki, ki la don kumba 112 ngut kiba dei ki Rohingya, 337 ngut ki nong Bangladesh bad 295 ngut ki nong India. Ki Rohingya Muslim, ki dei kiba la shahkem na ka shnong Churaibari hajan khappud Tripura. Kane ka dei ka jingdon bun eh jong kiba rung beaiñ hapoh ka jylla ha ki lai snem ba la leit,” u la ong.
