Agartala, Kyllalyngkot:
Ha ka jingpyntreikam kaba jop ha ka miet jong ka lah sngi U Blei, ki pulit jong ka Tripura ki la ïoh bat ïa kawei ka kali Bolero ha Subnagar Nanka Point kaba don ha Ambassa jong ka Dhalai distrik, ha kaba kane ka la ïarap ban ïoh kurup ïa 13.6 kilograms u Ganja uba la tyrkhong.
Ha kaba ïadei bad kane ka jingjia ki la don arngut ki briew kiba la shahkem bad ïa kine la tip kyrteng kum u Bapi Sharma bad u Tanmoy Sharma.
Ha ka por ba la pynlong ïa ka jingleit khynra, ki heh pulit ka Tripura ki la ïoh ban kurup ïa 26 song u Ganja napoh kane ka kali.
Kine ki briew kiba la shahkem ki dei ki nongshong shnong jong ka thaiñ Tulakona ha Khayepur jong ka Agartala, mynta kine ki don ha kti jong ki pulit na ka bynta ka jingtohkit.
Ki pulit ki dang ïaid shakhmat ban leh ïa kaba donkam bad pynngat ïa ki hapoh ka kyndon Narcotic Drugs and Psychotropic Substances (NDPS) Act.
U Officer-in-Charge (OC) Biswajit Debbarma u la ong ba kine ki briew kiba la shahkem kin sa shah ïalam sha ka ïingbishar hadien ka jingshah tohkit ha ki pulit.
Kane ka jingpyntreikam jong ki pulit ka long shi bynta ban ïakhun pyrshah halor ki kam beaiñ bad kumjuh ban ai jingshngaiñ ïa ki paidbah ha ka thaiñ Ambasa.
