Shillong, K’Lyngkot 03
U khlur nongtied ba kynsai ka ri u Virat Kohli u la jam haduh saw kyrdan na ka bynta ban don ha ka kyrdanba khyndai ha ka ICC Test Ranking hadien ba u la lah ban pynpaw ïa ka jingtbit na ka bynta ban kamai ïa ka spah run ha ka jingïalehkai Test pyrshah ïa ka South Africa.
U Kohli uba la don shabar na ka thup shiphew ha u 2022, hynrei ka jinglah ban kamai 38 bad 76 run ha ka jingïalehkai Test kaba nyngkong pyrshah ïa ka South Africa ha ka taiew ba la dep ka la pynlong ïa u ba un wanphai biang sha katei ka thup kaba shiphew.
Hynrei ka ‘rating points’ kaba 103 ka la long shabar na u nongtied ba kynsai u Kane Williamson uba ïoh ban lamkhmat, katba u Joe Root bad u Steve Smith kiba la don ha ka kyrdan ba-ar bad balai.
U kapten ka kynhun ïalehka ka ri u Rohit Sharma u la shah pynhiar sha ka kyrdan ba 14 hadien ba u la lah ban kamai tang san ki spah run. Kumjuh u KL Rahul u la jam haduh 11 kyrdan kata sha kaba 51 hadien ba u la lah ban kamai 101 bad saw ha kaba sdang jong ka series.
Ha ka liang ki nongka-wang bol, u Ravichandran Ashwin u la ïai sah ha ka kyrdan ba hakhlieh, watla u la lah ba khur shi wiket na ka bynta ki 41 run, katba u Ravindra Jadeja bad u Jasprit Bumrah ki la don ha ka kyrdan ba saw bad basan.
U Jadeja u la ïai bteng ban lamkhmat ha ka thup jong ki rangïalehkai (all-rounder) ha kaba la bud sa u Ashwin uba al wan ha ka kyrdan ba-ar, kata u Shardul Thakur u la shah pynhiar sha ka kyrdan ba 34.
Haba phai sha ka kynhun ïalehkai ka ri India ka la bat ïa ka kyrdan ba hakhlieh da kaba kamai 118 point, kata hashwa ïa ka Australia bad ka England.
