Shillong, K’Lyngkot 03
Ka kynhun ïalehkai Indian Super League ka Mohun Bagan Super Giant ka la ïakhlad lok noh bad u coach u Juan Ferrando hadien ba kane ka kynhun kam shym la lah ban ïalehkai bha ha ka aïom ïalehkai 2023-24, la pynpaw kane ka klob ha ka sngi Balang.
U coach barim u Antonio Habas, uba la pynïaid teng ïa ka ATK bad ka ATK Mohun Bagan ha ka ISL, un shimti kum u coach ba shipor hashwa ban sdang ka Kalinga Super Cup mynta u bnai.
Hadien ka jingïalehkai bha ha kane ka aïom, hynrei kane ka klob ka la sdang ban hiar arsut naduh u Naiwieng ha kaba ka Mohun Bagan ka la shah rem ha ka AFC Cup (group stage) bad ka la shah rem lai sien ha ka ISL.
Kumba ka long mynta ka Mohun Bagan ka la don ha ka kyrdan ba san bad kamai hynñiew point hadien ïa ka Kerala Blasters watla ka dangsan sa sien sien ïakhun ha ka wat kaba nyngkong.
Utei u coach uba na Spain (Ferrando) u la ïasoh sha ka Mohun Bagan hapdeng jong ka aïom ïalehkai 2021-22 bad u la lah ban pynlong ïa kane ka klob ban khur ïa ka nam lahduh ha u 2023 bad ha ka Durand Cup ha kaba sdang jong kane ka aïom ïalehkai.
Ha ka lympung ïalehkai Indian Super League, ka Mohun Bagan ka la khur jingjop tang shisien na ki saw sien ïakhun ba la lah, ha kaba ka la lah ban thep tang san kol bad shah thep haduh phra kol.
Ha ka AFC Cup, ka Mohun Bagan kam shym la lah ban jam sha kawei pat ka wat jingïakhun na ka jingïalehkai group stage ha kaba ka la shah rem ha ka kynhun ïalehkai kaba na Maldives ka Maziya bad ka Bashundhara Kings kaba na Bangladesh.
“Ka “Mohun Bagan Super Giant ka hap ban kylliang noh ïa u coach. U Juan Fernando u la shah weng bad yn shimti shipor da u Antonio Lopez Habas u ban shimti ban pynïaid kum u coach na ka bynta ka Super Cup. Ngi ai khublei ïa u Juan Ferrando uba la lah ban pynurlong ïa ka kynhun ban khur jingjop ha ka ISL (2022-23) bad mynta ka aïom ha ka Durand Cup,” la ong ka Mohun Bagan kat kum ka kyrwoh.
