Guwahati, Kyllalyngkot:
Ka sorkar Assam ka la pyrshang ban pyntreikam ha kaba ïadei bad ka jingkhmih bniah ïa ki Madrassa jong ki riewshimet bad ban pynkylla noh ïa ki sha ki skul pule kumba long lem kiwei pat, la ong u Myntri Rangbah jong ka jylla u Himanta Biswa Sarma ha ka sngi rakhe Snem Thymmai.
Kane ka rai ka la long hadien ba ka sorkar jong u ka la dep lypa ban khang ïa baroh ki Madrassa ba la pynïaid da ka sorkar ha ka jylla bad pynkylla ïa ki sha ki skul pule na ka bynta ïa baroh.
“Ki Madrassa jong ki riewshimet ki don hapoh ka jingïada jong ki Riti synshar jong ka ri ha kaba la thoh ba ka sorkar kam lah ban ktah ïa ki jaka pule jong ki rit paid ne ki Muslim kiba long ki jaka ai jinghikai. Kine kim hap hapoh ka jingtreikam jong ka RTE Act. Hynrei la ong ba ki pulit jong ka Assam bad ka tnat pule-puthi ki la ïatreilang na ka bynta ban pynduna la kumno kumno ïa 1000 tylli ki Madrassa jong ki riewshimet. Na ki 3000 tylli, kan sa hiar sha ki 2000 tylli bad mynta ngi la ïakren halor kane bad ki kynhun nongpynïaid jong ki Madrassa,” u la ong.
“Ki la don kumba san tylli ki kynhun bapher bapher kiba kam ba ki dei ki nong Assam kiba dei ki Muslim, ngi ïohpdiang ïa ka jinglum khana samari bad ngi la ithuh ïa ki shnong ha kaba kine ki kynhun Assamese Muslim ki shong ki sah, kumjuh ruh ki don kiba shong shnong ha ki Ward kiba don ha ki thaiñ Municipal ha kaba ki Assamese Muslim ki shong ki sah, kine ki la shah ithuh bad ha bakut jong u 2024, ngin sa pyndep ïa ka jinglum khana samari,” la ong u Sarma.
U Myntri Rangbah jong ka Assam u la bynrap shuh shuh da kaba ong ba ka sorkar jong u kan sa pyndep ha kaba ïadei bad ka jinglum thymmai ïa ka khana samari jong ki Assamese Muslim ha bakut une u snem ba mynta.
Kumjuh u Sarma u la ong ba ki la don shuh sa kumba ar tylli ki distrik jong ka Assam ki ban sa phah weng noh ïa ka AFSPA ha une u snem.
“Ka sorkar Assam mynta ka la thmu ban weng lut noh ïa ka jingpyntreikam hapoh ka AFSPA ha kaba mynta ka dang treikam ha ki saw tylli ki distrik. Nga tharai ba ha ka jingpyntreikam jong ka kylla ka ban wan, ngin sa weng noh ïa ka jingtreikam jong ka AFSPA na ar tylli ki distrik. Ka sorkar kmie kam shym kwah ban weng noh ïa ka AFSPA na ka thaiñ jong ki bynta khappud kiba don hapdeng ka Assam, Nagaland bad Arunachal. Ka dei ka bynta ba la hap ban leh mynta, bad ha kajuh ka por ïa ka AFSPA la thmu ban weng lut noh,” u la ong.
