Shillong, K’Lyngkot 04
Ka jingïalehkai Test kaba ar hapdeng ka India bad ka South Africa ha Cape Town ha ka sngi Palei ka la long kaba lyngkot tam ban pyndep ïa kane ka jingïalehkai.
Kane ka jingïalehkai ka la neh tang saw kynta shiteng bad la lah ban pyndep tang ha ki ar sngi ha kaba ka India (153 & 80/3) ka la lah ban pynliem noh ïa ka South Africa (55 & 176) da 7 wiket na ka bynta ban ïakhaid mar 1-1.
Ka India ka la mad ïa ka jingshah rem ha ka jingïalehkai Test kaba nyngkong da shi inning bad 32 run ha Centurion ha kaba kane ka jingïalehkai ka la neh tang lai sngi.
Kumba ka long mynta ka India ka la long ka kynhun kaba nyngkong eh na Asia ban khur ïa ka jingjop ïa ka Test ha Cape Town. Kane ka long ka sien kaba 25 ba ïa ka jingialehkai Test la lah ban pynkut tang ha ki ar sngi naduh u snem 1882.
Kane ka long kaba lyngkot eh ban pyndep ïa ka jingïalehkai Test ha kaba ïadei bad ki over bad ki jingkawang bol (642 balls – 107 overs), katba kaba kham hashwa ka long (656 balls – 109.2 overs) ha kaba ïakhun hapdeng ka Australia bad ka South Africa ha MCG way ha u snem 1932.
Lah ban ong ba kane ka dei ka sien kaba lai ba ka India ka la lah ban pyndep ïa ka jingïalehkai Test tang ha ki ar sngi. Ka jingïalehkai kaba la lah ka long pyrshah ïa ka Afghanistan ha Bengaluru ha u snem 2018 bad ïa ka England ha Ahmedabad ha u 2021.
