Kathmandu, Kyllalyngkot:
Ka sorkar Nepal ha ka Sngi Ba-ar ka la pyntip ba ha kane ka sien la lap ba ki don sa lai ngut ki nong Nepal kiba iap hapdeng ka thma Russia bad ka Ukraine bad kiba ïashim bynta ha katei ka thma ban iakhun na ka bynta ka Russia. Da kane, ka la nang kyntiew ia ka jingdon jong ki nong Nepal kiba iakhun ha katei ka thma naka bynta ka Russia sha ka 10 ngut baroh.
Hynrei ka tnat kam bar ri jong ka Nepal kam pat shym la ai jingpynshai tikna shaphang kitei ki 3 ngut ki nong Nepal kiba khlad ha kane ka sien bad dang pyn-ap ban ioh ia ki jingtip kiba bniah katba dang wad bniah bha ia ka jingiadei bad ka rukom treikam jongki bad ka Russia.
Nalor jong kitei ki 3 ngut kiba khlad bad kiba la ioh lum jingkheiñ ha une u snem 2024, ka tnat kam bar ri ka Nepal ka la pyntip ba 7 ngut kiwei pat ki nong Nepal ki dei kiba khlad ha u Nohprah jong u snem 2023 katba ki dang iakhun naka bynta ka Russia ban ialeh pyrshah ia ki shipai ka Ukraine ha katei ka thma.
Hashwa jong kane, ka Nepal ka la kam ruh ba 4 ngut ki nongshong shnong ka Nepal kiba iakhun thma na ka liang jong ka Russia ki la shah kem bad shah bat noh ha ki shipai ka Ukraine hynrei ym shym la ioh jingtip shai eiei shuh kaba bniah shaphang kane tad haduh kane ka kynti ba mynta.
Ka sorkar Nepal ka la shu buh jingkheiñ antad ruh ba kin don kumba 200 ngut eiei ki nong Nepal kiba leit shong sha Russia kum ki khynnah pule na ka bynta ki kyrdan jingpule bad ki laiñ pule bapher ba ki leit ban pyntbit ialade sha Russia. Hynrei namar jong ka thma hapdeng ka Russia bad Ukraine, ka Russia ka la pynrung kam shipai noh ia kitei ki khynnah pule bad kiba long ki nong Nepal khlem da ioh ia ka jingbit ne khlem da kynjoh ktien eiei ia ka Sorkar Nepal watla ki long ki nongshong shnong ba pura jong ka Nepal.
Kumta ruh ka tnat kam bar ri jong ka Nepal ha kane ka por ka la ban jur biang ba ka Russia kam bit ban pynrung kam shipai ne ban phah leit tur thma ia ki nongshong shnong ka Nepal watla ki shong- ki sah hapoh Russia hynrei ki leit naka bynta kiwei pat ki kam katkum ka jingdonkam jong ki shimet-shimet.
