Shillong, K’Lyngkot 04
Ka Shillong Cricket Association ka la sdang ïa ka lympung ïalehkai Third Division Cricket League ha ka sngi Palei ha madan Urkaliar ha kaba ka Power Grid bad ka Young Langsning ki la khur ïa ka jingjop.
Ïa kane ka lympung la ïasnoh kti lang bad ka Samkhamti ha kaba la ïadon lang ha kane ka sngi da u Bah Samborlang Diengdoh, ryngkat ki dkhot ka SCA bad kiwei.
Ha ka jingïakhun kaba nyngkong ka Power Grid ka la pynliem noh ïa ka Inningstar XI da 5 wiket. Ka Inningstar kaba la kam trai ban tied nyngkong, ka la kamai 139/4 ha ki 20 over. U Akash Kumar u la khyrwit ïa ka shiteng spah run kaba 56 run na ki 54 bol bad u Rounak Das u la tied 29 run na ki 38 bol. Katba u Yogendra Singh u la khur 3 wiket bad ïa ka shi wiket la khur da u Pradeep Varun.
Haba wan shimti ïa ka pali kaba ar ka Powergrid ka la kynjoh sha ka thong da kaba kamai 144/5 ha ki 16 over. U Kunwardhrub u la tied 45 run na ki 23 bol bad u Utpal Das u la ïoh 30 run na ki 21 bol. Katba u Abhishek Kumar Yadav u la khur shi wiket. Ïa ka nam Player of the Match la khur da u Yogendra Singh.
Haba phai sha kawei pat ka jingïakhun kaba ar ka Young Langsning ka la jop da 12 run ïa ka Sawmer.
Ka Young Langsning ka la shimti ban tied nyngkong ha kaba ka la kamai 132/8 ha ki 20 over. U Sylvister Wanñiang u la khyrwit ïa ka shiteng spah run kaba 52 na ki 39 bol bad u Alvin Marbaniang u la ïoh 23 run na ki 30 bol. Katba u Jamsing Thawmuit u la khur 3 wiket bad ïa ki 2 wiket la khur da u Badap Tynsong.
Haba wan beh ïa ka thong, ka Sawmer ka la kamai tang 120/6 ha ki 20 over. U Poilangson Thawmuit u la tied 28 run na ki 26 bol bad u Dakerlang Basaïawmoit u la ïoh 24 run na ki 24 bol. Katba u Gavin Nongkynrih u la khur 3 wiket bad ïa ki 2 wiket la khur da u Bankupar Nongkseh. Ïa ka nam Player of the Match la khur da u Sylvister Wanñiang.
