Shillong, K’Lyngkot 04
U coach ka Roma u Jose Mourinho u la pynkut ïa ka khubor hamsaïa ba u don jingthmu ban shimti kum u manager ka Brazil, da kaba u la ong ba mynta u dang pynleit jingmut bad ka kynhun ïalehkai Serie A.
“Ka Brazil kam shym la phah ktien ïa nga,” u la ong hadien ba ka Roma ka la ïoh jingjop ha ka pre-quarter final jong ka Italian Cup ha ka janmiet jong ka sngi Balang.
“Nga ong ïa u nonglam ktien jong nga ba ym dei ban ïakren ïano ïano tad haduh ba ngan da tip shai la ka Roma ka dangkwah ne kan pyllait noh ïa nga,” la ong utei u coach na Portugal.
“Ngam ju ngeit ïa ki khubor hamsaïa kiba ïathuh lypa ha kaba jingïadei bad ka kam manager. Nga don ka jingshaniah ha ka Friedkin Group kaba la long trai ïa ka Roma.”
“Ngam don jingartatien eiei bad ngam don daw eiei ba ngan pyrkhat shaphang ka jingïakren na lyndet ban weng noh ïa nga na kane ka kam,” u la bynrap
U Mourinho uba la 60 snem ka rta, u la shimti ban pynïaid kum u coach ïa ka Roma ha u Naitung jong u snem 2021, bad ka kontrak ka jong u kan kut noh ha u Jylliew.
Ha kine ki ar snem une u coach u la lah ban pynurlong ïa kane ka klob kaba na Italy ban jam sha ka final ha ka Europa League ha ka aiom ba la lah.
Kumba ka long mynta ka Roma ka la don ha ka kyrdan ba hynñiew, ha kaba ka dangduna haduh 17 point ïa ka Inter Milan kaba danglamkhmat ha kane ka lympung. Na ka liang u Mourinho u la kynthoh ba ka dei ka jinghiar ka kynhun ha ka rukom ïalehkai.
Une u coach u la hap ban kham pyrkhing ban soi rangïalehkai ha kane ka ïew ïathied rangïalehkai na ka daw ba kane ka klob ka don hapdeng ka jingpyrkhing ban pynlut ha ka ban soi rangïalehkai.
Kumba ka paw ka Brazil ka la don hapdeng ka jingeh ha ka lympung ïaknieh na South America ban ïoh rung sha ka World Cup 2026.
Ha ka taiew ba la lah, u Carlo Ancelotti, ïa uba ka Brazil ka la khmih lynti ban thung ïa u kum u manager ba thymmai, u la pynbna ba un ïai neh ha Real Madrid, hadien ba u la bteng biang ïa ka kontrak bad kane ka kynhun ïalehkai ba khlaiñ bor na Spain haduh u 2026.
