Bengaluru, Kyllalyngkot:
U Myntri Rangbah jong ka Karnataka u Siddaramaiah ha kine ki khyndiat sngi, u la ong ba ka jylla ka la ngat ha ka jingeh na ka jingduhnong kaba T. 35,000 klur ki jingthung ha 48 lak hectare ka jaka rep na ka daw jong ka jingrang tyrkhong bad u la ong ba ka jingïarap pisa na ka sorkar kan ym pat biang lada ka jinglong ka mariang kam lah ban kyrshan ïa ki.
Kum ka jingai khubor snem thymmai sha ki heh sorkar kiba la ïakynduh ïa u, u Myntri Rangbah u la pynpaw ba u don ka jingkyrmen ba u snem 2024 un sa long u snem jong ka jingkular na ka bynta ka jylla ha kaba kiei kiba la thmu kin sa urlong bad ki ban lah ban kyrshan khamtam ïa ki nongrep kiba ju ïakynduh jingeh na ka por sha ka por.
“Ngi la ngat ha ka jingduhnong kaba T. 35,000 klur ha ki 48 lakh hectares ha ka jylla namar ka jingrang tyrkhong. Ka jingai jingïarap jong ka sorkar kan ym pat biang lada ka mariang kam ai jingkyrshan ïa ngi. Ngi la ïakynduh jingeh shibun ha kaba ïadei bad ka jingkylla jong ka suiñ bneng. Ka jingpahuh jong ka jinghap slap la khmih lynti ba kan sa don ha u snem 2024. Nga duwai ïa U Blei ba un ai ka jinghap slap kaba pahuh,” u la ong ha ka por ba u la ai jingkren.
U Siddaramaiah u la ban jur da kaba ong ba ka jingjur jong ka jingrang tyrkhong ka la buh jingeh ïa ka sorkar jylla.
U Myntri Rangbah u la ong ba u slap uba la long uba kongsan na ka bynta ka roi ka par kumba khmih lynti.
Ki la don palat 60 per cent ki briew kiba la shu shaniah ha ka kam rep kam riang.
“Kane ka la long namar ka jingbuh thong jong ngi ha ka jingjur jong ka jingrang tyrkhong ka la duna. Ki longïing ki baduk ki la hap ban thied bording,” u la ong.
