Taipei, Kyllalyngkot:
Ka tnat iada jong ka Taiwan ha ka Sngi Balang ka la pyntip halor ka jingleit tur jong 4 tylli ki kynja balun ‘Spy Balloon’ ha kylleng ki bynta khappud kaba pyniakhlad ia ka China na ka Taiwan.
Katkum ki dur ba la pynshisha da katei ka tnat iada jong ka Taiwan, la iohi ia 3 tylli kitei ki kynja tiar kiba long kum ka balun bad kiba wan poi na ki bynta Northeast jong ka Taiwan bad hadien kata pat la iohi ba ki la leit poi sha ki bynta Southwest jong ka thaiñ Ching-Chuan-Kang.
Ka jingjngai ba hajan eh jong kawei na kitei ki balun ka dei kaba leit her kumba 12,000 phut (3,658 Metre) shalor suiñ.
Kane ka jingleit phah syntiat jong ka China sha Taiwan ka long hashwa 2 taiew ba katei ka ri dew lynnong Taiwan kaba synshar hi dalade, ka dang pynkhreh ban ioh pynlong noh ia ka ilekshon ha kane ka por.
Ka tnat iada jong ka Taiwan ka la sdang ban iohi teng ia ka jingleit syntiat jong kitei ki kynja tiar balun jong ka China dei naduh u Nohprah jong u snem 2023 ba la leit.
Hynrei ha katei ka Sngi Balang, ka Taiwan ka la pyntip ba ka rukom leh jong ka China ha kane ka por ka la i-pher bad kham i-shon khmat namar ka China dang shen ruh ka la dep pynbna lypa ba ka China ka lah ban pyniasoh noh ia katei ka dew lynnong sha lade ha kano- kano ruh ka por katba ka sngewbit ban leh ia kata.
Namarkata, ka Taiwan ka la ong ba katei ka jingleit phah syntiat jong ka China ia ki tiar syntiat ka la pynthud ia ki rukom treikam bad ki jingpynkhreh jong ka Taiwan naka bynta katei ka ilekshon ka ban wan.
