Shillong, K’Lyngkot 04
U Bah Process T. Sawkmie ha ka sngi palei u la ïoh ban lehkmen snem thymmai bad ka Umpling Umjathang Sports Club da kaba pynïalehkai ïa ki khynnah bad ki samla shnong ha madan shnong jong ki.
Ha kane ka jinglehkmen la ïadon lang u Bah Homer Kharkongor, President ka UDP Mawlai Circle, ki nongkitkam ka UDP Mawlai Circle, rangbah dong Bah K. Kharumlong, ki nongkitkam dong, ki paidbah nongshong shnong bad kiwei kiwei.
Ki jingïalehkai kiba ka Umpling Umjathang SC ka la pynïalehkai ki long kum ka mareh byrni, mareh shamoit, mareh 100 mitar, ka phutbol ki shynrang bad ki kynthei bad kiwei kiwei ki jingïakob mareh.
Haba kren kum u kongsan u Bah Sawkmie u la pynpaw ïa ka jingkmen ba u la ïoh ban ïalehkmen lang bad ki nong Umpling Umjathang, kiba la pynlehkmen ïa ki khynnah, ki samla bad kiwei ki nongshong shnong.
Ha kane ka sngi la ïoh ruh ïa ka jingkren na u Bah Khraw Lyngdoh, ba pynïaid ïa ka jingïalang, na u Bah K. Nongphud bad na u rangbah dong Bah K. Kharumlong uba la ai khublei haba pynkut ïa ka prokram. U Bah PT Sawkmie u la ïoh ruh ban sam ïa ki khusnam sha kiba jop.
Haba ïadei bad kane ka prokram, ka Umpling Umjathang SC ka la ai khublei bad pynpaw ïa ka jingsngewnguh ïa u Bah PT Sawkmie halor ka jingdon bynta jong u bad ka shnong.
