Kochi, Kyllalyngkot:
Naba la sakhi, ha ka jingnang bun jong ki briew kiba la ngop ha ki jingdih pynbuaid kynthup u drok bad kiwei pat, ka jylla Kerala ka la buh hakhmat eh ïa ki jingdonkam na ka bynta ban tehlakam ïa ka jingjur jong ka jingkhaïi tuh ïa ki jingdih pynbuaid kaba la pynngop ïa kiba bun ki briew ha kaba na ka jingngop ha ka jingdih kynja kiba bun ki la ngop sa ha ka jingdih drok. Kane ka jingïoh laitlan jong ki riewsniew ban pynjylla ïa kum kine ki kam hapoh ka jylla ka buh jingman ïa ka lawei jong ki samla khamtam ki khynnah pule ha kaba kumba la sakhi, la ong ba kiba bun na kiba la ngop ha kum kine ki jingdih pynbuaid ki dei ki samla kiba dang khie dang san bha.
Kumba la sakhi, la ong ba u Ganja u la long u jingdih ïa uba la kham lah ban khaïi napdeng kiwei pat ki jingdih pynbuaid bha ha ka jylla ha kaba la khaïi da ka lynti kaba beaiñ.
Ha kaba ïadei bad kane katkum ka jingai jingkheiñ ba dang shen jong ki pulit, la paw ba ka jingdon jong kine ka la kylla shibun ha kaba la sakhi ba ki la don bun ki briew ba la ju pyndonkam ïa kum kine ki la kylla pyndonkam noh da u drok kum u MDMA bad kiwei pat kiba kham khlaiñ bor ha kaba ki long kiba ktah jur.
Katkum ka jingïohlum jingkheiñ la ong ba ka jingïoh ban kurup ïa ki jingdih pynbuaid ka la kham jia khah khah naduh u 2019, 2020, 2021 bad kaba dang bteng haduh u snem ba la lah.
Ki pulit na ka por sha ka por ki la bteng ban pynlong ïa ka jingleit khynra ha kaba ki la don ruh bun ngut ki briew kiba la shahkem bad la ïoh ruh ban kurup ïa kiba bun ki jingdih pynbuaid kynthup ïa u Ganja bad u drok. Ki pulit ha kylleng ki jaka jong ka ri ki la ïaleh katba lah ban tehlakam ha kaba ïadei bad ka jingkynrei jong ki briew ba pyndonkam ïa ki jingdih pynbuaid bad kiwei pat ki jingdih kiba ktah ïa ka koit ka khiah.
