New Delhi, Kyllalyngkot:
Ki bor ba dei khmih na ka jingkhmih bniah ha kaba ïadei bad ki jingdon bun ki jingujor ba la buh ha ki jaka treikam jong ki pulit, ki la sakhi ba ki kam thombor pyrshah ïa ki khynnah ka la nangjur katba nangmih ki sngi ha kaba kane ka buh jingsyier ïa ki khynnah rit khamtam haba ki dei ban leit jingleit marwei ne ki mih ban leit sha skul.
Kiba bun ki khynnah la ka long habar ne haïing ki ju shah pyndonkam bakla ha ki riewshim kabu kiba la nud ban pynsniewdur ïa ka longrynïeng jong ki.
Ka jingshah pyndonkam bakla jong ki khynnah ka la long manla ka sngi bad ha kaba ïadei bad kane, ki heh ba dei khmih, ki la ong ba ki dang don bun ki khynnah kiba la shah pyndonkam bakla ha kaba kiba bun na ki kim nud ban ïathuh ïa la ki jong ki jingshem naba ki sheptieng na ka jingshah byrngem.
Ha kaba ïadei bad kane ka bynta, kiba bun ki jylla kiba hapoh ka ri ki la ïaleh ba khanglad bad ban pynduh pyndam ïa kum kine ki kam siew kiba long pyrshah ïa ki khynnah.
Ka Allahabad High Court hadien ba ka la dep ban pynlong ïa ka jingkhmih bad bishar bniah ha kaba ïadei bad ki rukom jingpynshitom ba la ai sha ki runar kiba ju mlien ban leh ïa ki kam thombor pyrshah ïa ki khynnah rit, ka la ong ba ka jingpynshitom ïa ki runar ha kaba ïadei bad ki kam sniew pyrshah ïa ki khynnah rit ka long kaba sting palat.
Nalor kane, ka la ong ba ki jingpynbna ïa ki khubor pynsngewthuh halor kumno ban shimkhia ha kaba ïadei bad ki jingshah thombor jong ki khynnah ki la duna bha ha ka imlang sahlang, kynthup haman ki ïingbishar kiba don hapoh ka ri.
Ka aiñ POCSO ïa kaba la pynngat ïa ki briew kiba ju thombor ïa ki khynnah rit, ka long shi bynta ban lah ban tehlakam bad ban ïada ïa ki khynnah ba dang poh rta.
Na ka liang jong ki pulit ki la ïaleh katba lah ban pynduh pyndam ïa kum kine ki kam sniew kiba long pyrshah ïa ki khynnah rit. Ha kaba ïadei bad kane, ki kynhun wadbniah bad kiba bun ki kynhun treimon sngewbha ha ryngkat ka jingtreilang jong ki pulit ki la ïaleh katba lah ban tehlakam ïa kum kine ki kam thombor.
Kum shi bynta ban lah ban tehlakam ïa ki kam thombor pyrshah ïa ki khynnah rit, ka kynhun CBI ha New Delhi na ka por sha ka por ka ju pynlong ïa ka jingleit khynrakhamtam lada don ki khynnah kiba jah ne sharahbor nalor kiwei pat ki jingjia ba la don kiba wan buh jingujor.
Ka jingthwet ïa ki runar kiba la shah pynshisha ba ki la donkti ha ka ban pyndonkam bakla ïa ki khynnah rit ha ki kam awria bad ban pynsaphriang kylleng pat ïa ki kam jaboh jong ki ha kylleng ki lad phah khubor ka dang ïai bteng, la ïathuh ki heh pulit.
Ïa ka jingleit khynra la pynlong ha Andhra Pradesh, Delhi, Uttar Pradesh, Punjab, Bihar, Odisha, Tamil Nadu, Rajasthan, Maharashtra, Gujarat, Haryana, Chhattisgarh, Madhya Pradesh bad Himachal Pradesh, la ïathuh u nongaiktien jong ka kynhun CBI u RC Joshi.
Kiba bun na ki seng treimon sngewbha ki la ong ba ka jingïai bteng jong ka jingdon ki kam thombor kiba long pyrshah ïa ki khynnah ha kaba ïadei bad ka burom ka ijot jong ki ka buh jingman shi katdei eh ïa ka lawei jong ki khynnah kiba ngat ha kum kine ki apot.
Na ka jingai jingmut jong kiba bun ki kynhun ba dei khmih bad ba dei ban pynïoh ïa ka hok longbriew manbriew, la ong ba ka jingpynshitom ïa ki runar kiba la thombor pyrshah ïa ki khynnah rit ka la dei ban long da kaba tyngeh ha kaba ki la hap ban shah pynshitom saja wat haduh ban shah pynïap ha ki kti jong ka aiñ khnang ban lah ban tehlakam bad ban ai jingsneng ïa ki riewshim kabu kiba ju mlien ban leh ïa ki kam sniew kiba isaitmet pyrshah ïa ki khynnah kiba dang poh ha ka rta.
Ka jingshah byrngem jong ki khynnah ha kaba ïadei bad ka jingshim kabu ban pyndonkam bakla ïa ki ka lah ban long nangno nangno ruh, la ka long na ka liang ki bahaïing, ki marjan, ki ongtrei, ki paralok bad na kiba bun ki riewshim kabu.
Wat lada ïa ka Protection of Children from Sexual Offences (POCSO) Act, la pyntreikam ha u snem 2012 ka jingpyntreikam ban ai ka jingïada na ka bynta ki khynnah na ka jingshah pyndonkam bakla kam pat treikam ei ei.
