Shillong, K’Lyngkot 04
Ha ka sien kaba nyngkong ka Meghalaya Cricket Association (MCA) ka la shim ïa ka rai ban ym pynrung shuh ïa ki rangïalehkai kiba nabar (guest professional players) ha ka Ranji Trophy jong ka aïom ïalehkai 2023-24.
Kumba ka paw ka Jylla ka la pyndonkam ïa ki rangïalehkai kiba nabar ha ka Syed Mushtaq Ali Trophy T20 tournament bad ka Vijay Hazare Trophy one day tournament kiba kynthup ïa u Rajesh Bishnoi, Tanmay Mishra bad u Nakul Verma ha kaba ki la lah ban ïalehkai bha. Hynrei ha kane ka kynti kaba mynta ka MCA kan pynïalehkai beit tang da ki rangïalehkai kiba napoh ka Jylla.
Kane ka long ka jingsarong kaba khraw ba kum ki rangïalehkai ka Jylla ban ïoh ïa kum kane ka lad ban pynpaw ïa ki sap ïalehkai, ka jingtbit ha kum kane ka lympung ïalehkai kaba heh.
Te kumta ka Meghalaya kan pynkhreh ïa ka jingïalehkai kaba nyngkong pyrshah ïa ka Arunachal Pradesh ha Anand, Gujarat naduh ka sngi Thohdieng. Kiwei pat ki kynhun kiba la don ha kane ka group ki long ka Hyderabad, Nagaland, Mizoram bad ka Sikkim.
Ki 15 ngut ki rangïalehkai ki ban mihkhmat ïa ka Jylla hapoh ka jinglahkhmat da u Kishan Lyngdoh kum u kapten. Katba u Akash Kumar Choudhary kum u Vice-Captain, hynrei ka jingmynsaw kan pynlong ïa u ban duh ïalehkai bad ha ka jaka jong u yn shimti noh da u nongkawang bol (fast bowler) u Chengkam Sangma.
Ki rangïalehkai ka Jylla ki kynthup ïa u Arbin Singh, Arien Bonchang Sangma, Bamanbha Shangpliang, Bijon Dey, Dippu Ch Sangma, Jaskirat Singh Sachdeva, Kishan Lyngdoh, Lerry G Sangma, Md Nafees Siddique, Ram Gurung, Raj Biswa, Swarajeet Das, Sanvert Kurkalang bad u Tarique Siddique.
Katba u Goutam Shome (head coach), Moisten Ch Marak (assistant coach), Surojit Biswas (physio), Vikash Singh Chauhan (trainer) bad Bah Dister Marbaniang (manager).
