Shillong, K’Lyngkot 04
Ka Shillong Lajong FC ka pynbna ba la soi ar ngut ki rangïalehkai ban pynkhlaiñ ha ka bynta kaba shakhmat ha ka aïom ïalehkai I-League kaba dangsah.
Kine ki kynthup ïa u Denzil Kharshandi bad u Douglas Rosa Tardin uba na Brazil.
Kat kum ka kyrwoh la ong ba u Douglas Tardin u la sdang ïa ka kam ïalehkai jong u ha Brazil. U la ïoh ruh ban leit ïalehkai ruh ha kiwei pat ki ri kum ha Switzerland bad Angola.
Hadien une u rangïalehkai u la leit ïalehkai sha ka dewbah Asia ha kaba kum u rangïalehkai u la ju mlien ban ïalehkai ha ki ri ka pyrthei kum ha Cambodia, Vietnam bad Thailand. Kham hashwa u la mihkhmat ruh ïa ki klob ha South East Asia kum ka Quang Nam, Saraburi United bad ka Suphanburi.
Haba phai sha u Denzil Kharshandi, u dei u rangïalehkai uba la san ha ka kam ïalehkai na ka DSK Shivajians, ha kaba u la ïoh ban mihkhmat na ki klob kum ka Punjab FC, ARA FC bad ka Mohammedan SC.
Kumba ka long mynta ka Lajong ka la don ha ka kyrdan ba san ha kaba ka la kamai 19 point na ki khatwei sien ïakhun bad ka dangduna haduh 8 point na ka Mohammedan Sportings, kaba la ioh ban lamkhmat ha kane ka lympung.
