Guwahati, K’lyngkot:
Ha kaba ïadei bad kawei ka jingjia kaba la wanrah ka jingduhnong kaba khraw, ki la don kumba 9 tylli ki ïing kiba la pluh ha ka thaiñ Checkon kaba don ha Imphal East distrik jong ka Manipur. Kane ka la jia ha ka miet jong ka sngi Palei, ha kaba na ka liang jong ki shipai ka tnat Central Reserve Police Force (CRPF) ki la pynkhlaiñ ïa ka jingpyntreikam ban ai jingïarap ha kaba ïadei bad katei jingjia ha ka thaiñ bad ban wanrah jingshngaiñ ïa ki nongshong shnong.
Kane ka thaiñ kaba dei ka jaka shong jaka sah jong ki jait bynriew Kuki Zo, Nagas, Muslim bad ki Meitei ki la ngat jingeh lypa na ka jingjia jong ka jingïakynad kaba jur kumba la sakhi.
Ki bor ba dei khmih ki la pyntreikam da ki CRPF bad pynjur ïa ka jingpahara khnang ban lait na kino kino ki jingjia kiba lah ban pynjur ne wanrah biang ïa ka jingïakynad na ki jingsaphriang ki khubor hamsaïa.
Ha kaba ïadei bad kane ka jingjia ki nongshong shnong ki la ïathuh ba ki la pyntip sha ki bor ba halor bad la phah wan ruh ïa ki kali pyllip ding, kaba sniewbok ka long ba kine ki kali ki la shim por haduh shi kynta ban pyllip ïa ka ding kaba la klang.
Na ka liang ki pulit kim pat lap ïa ka daw tynrai halor ka jingpluh kine ki ïing bad la antad ba namar ba ka dei ka aïom khriat ka jingpluh ka lah ban dei na ka daw ka jingsyaid ding, ka jingtohkit ha kaba ïadei bad ka jingjia ka dang ïaid shakhmat khnang ban lap ïa ka daw tynrai halor ka jingjia.
