Chandigarh, K’lyngkot:
Ka kynhun Enforcement Directorate ka la ïoh ban kurup ïa palat 100 tylli ki bitor kyiad, ka pisa kaba T. 5 klur, ki tiar siat ba la shna beaiñ na bar ri bad kumba 300 tylli ki kuli siat ha ka por ba la don ka jingleit khynra ha ka jaka sah jong arngut ki MLA barim ha Haryana bad ka Punjab, la ong ki heh ka kynhun wad bniah.
Ka kynhun tohkit ka la pynlong ïa ka jingleit khynra ha kiba bun ki jaka kiba don ka jingïadei bad u MLA jong ka Indian National Lok Dal (INLD) u Dilbagh Singh, u MLA barim ka seng Congress u Surender Panwar bad ki nongïarap jong ki halor ka jingshah kynnoh ba ki la donkti ha ka jingtih beaiñ ïa ki marpoh khyndew. Katba u Singh u la long u MLA jong ka seng INLD na Yamunanagar, u Pahwa pat u dei u MLA jong ka Congress ha Sonipat.
Ki la don kumba 20 tylli ki jaka kiba kynthup ïa ka Yamunanagar, Sonipat, Mohali, Faridabad, Chandigarh bad ka Karnal kiba la shah khynra ha ka sngi Palei. Ïa ka mukotduma halor ka kam kamai ïa ka spah bymhok la buh jingmudui da ka kynhun tohkit hadien ba ki pulit jong ka Haryana ki la buh ïa kiba bun ki jingmudui ha kaba ïadei bad ka jingdon jong ki jingtih beaiñ ïa ki marpoh khyndew, kiba kynthup ïa ki maw bad ki shyiap ha Yamunanagar bad ha ki distrik ba marjan hadien ba ka la don ka jingkhang tih marpoh khyndew da ka National Green Tribunal (NGT). Ha kaba ïadei bad kane ka bynta, ki MLA ki la shah kynnoh ba ki la pyntreikam thok ïa ka skhim ‘e-Ravaana’ kaba dei ka Online Portal ka ban pynmih ïa ki Bill bad ki slip na ka bynta ka jingtih beaiñ ïa ki marpoh khyndew ïa kaba la wanrah da ka sorkar Haryana ha u snem 2020 na ka bynta ban pynsuk ka jinglum ban lum ïa ki jingsiew bad ban khanglad ha ka ban don ka jinglum khajna ha ki jaka tih marpoh khyndew.
