Shillong, K’Lyngkot 05
Ka lympung ïalehkai Third Division Cricket League ba la pynïaid da ka Shillong Cricket Association ka la nangjam shaphrang ha kaba ka SMCA bad ka YALM C.C ki la ïoh jop ha ka sngi Thohdieng ha madan Umkaliar.
Ha ka jingïakhun kaba nyng-kong, ka SMCA ka la pynliem noh ïa ka Matador da 6 wiket. Ka Matador kaba la shimti ban tied nyngkong ka la kamai 125 run bad shah pynkhyllem 10 wiket ha ki 20 over. U Antony Kharsyntiew u la tied 43 run na ki 38 bol bad u Teikupar Nongkynrih u la ïoh 34 run na ki 27 bol. Katba u Naseer Ansari bad u Rehan Kharbuli ki la khur mar 3 wiket na ka bynta ka SMCA.
Haba wan shimti ïa ka pali kaba ar, ka SMCA ka la lah ban kynjoh sha ka thong da kaba kamai 129 run bad shah pynhap 4 wiket ha ki 12.2 over. U Ravi Shankar Yadav u la tied 43 run na ki 25 bol bad u Dilip Prasad u la ïoh 32 run na ki 22 bol. Katba u Om Chettri u la khur 2 wiket bad ïa ka shi wiket la khur da u Rector Ïawim. Ïa ka nam Player of the Match la khur da u Rehan Kharbuli.
Haba phai sha kawei pat ka jingïakhun, ka YALM ka la jop da 1 run ïa ka Young Star C.C. Ka YALM kaba la shimti ban tied nyngkong ka la lamai 147 run bad shah pynhap 9 wiket ha ki 20 over. U Arun Tamang u la tied 34 run na ki 21 bol bad u Tanveer Sharma u la tied 27 run na ki 23 bol. Katba u Md. Wahid bad u Shadab Alam ki la khur mar 2 wiket.
Haba wan beh ïa ka thong, ka Young Star ka la kamai tang 146 run bad shah pynhap 10 wiket ha ki 19.3 over. U Md.Wahid u la ïoh ban khyrwit ïa ka shiteng spah kaba 62 run na ki 38 bol bad u Mannan Surana u la tied 22 run na ki 30 bol. Katba u Tomu u la khur 4 wiket bad ïa ki Rohit Kumar Roy u la khur 3 wiket. Ïa ka nam Player of the Match la khur da u Tomu na ka YALM.
