New Delhi, K’Lyngkot:
Ka National Commission for Protection of Child Rights (NCPCR) ka commission kaba peit ïa ka hok ki khynnah ka la khot hajir (summoned) ïa ki Chief Secretary jong ki 11 tylli ki Jylla bad ki Union Territory kynthup jong ka Meghalaya halor ka jingbym shimkhia ne leh eiei ban ithuh ïa ki khynnah Hindu bad ki bym dei ki Muslim kiba la pynrung kyrteng hapoh ki Madrassas, bad ban pynrung pat ïa kine ki khynnah ha kiwei ki skul.
Ka National Commission for Protection of Child Rights (NCPCR) ka la pan jingshai halor kane, mynta la kumba shi snem tam. Ka la dep ban ong ba ka jingpynrung ïa ki khynnah bym dei ki Muslim ha ki skul Madrassas ka dei ka jingpynkheiñ ïa ka Article 28(3) jong ka riti synshar.
Kane ka Article, ka kren shai ba la khang pyrshah ïa ki jaka pule ban pynbor ïa ki khynnah ba kin ïashim bynta ha kino kino ki kam ba ïadei bad ka niam, khlem da ïoh jingbit na ki kmie ki kpa jong ki khynnah.
Ki Madrassas kum ki jaka pule, ki don ruh ka bynta ban ai jingnang jingtip ba ïadei bad ka niam sha ki khynnah, bad ka commission ka la ong bad bynrap ruh ba ka la ïoh jingtip ba ki Madrassas ba la bei pisa bad ïoh jingithuh na ka Sorkar ba ki sam ruh ïa ki jinghikai ba ïadei bad ka niam nalor ki jinghikai kiba ju ai ha ki skul.
U Chairperson jong ka Commission u Priyank Kanoongo u la ong ba ka commission ka la ïai bteng ban bthah ïa baroh ki jylla bad ki Union Territories (UTs) ha kine ki shi snem ba la leit ba kin ithuh ïa ki khynnah Hindu bad ki bym dei ruh ki Muslim kiba leit sha ki skul Madrassas lane ki sah ha Madrassas, bad ban pynkynriah noh ïa ki sha kiwei pat ki skul.
Kumta, namar ka jingbym shimkhia bad leh klet da ki jylla, ka Commission ka la rai ban khot hajir ïa ki Chief Secretary jong ki 11 tylli ki Jylla ba kynthup ruh ïa ka Meghalaya ban pan jingshai halor kane ka kam.
Ka la khot hajir ïa ki Chief Secretary jong ka Haryana, Andhra Pradesh, Chhattisgarh, Andaman and Nicobar Islands, Goa, Jharkhand, Karnataka, Kerala, Madhya Pradesh, Meghalaya bad Telangana.
La bthah ruh ïa ki Chief Secretary ba kin don marmet ne markhmat hakhmat jong ka commission ryngkat ka jingpynshai halor ka jingbym shimkhia ne leh eiei bad ki jingtip ba la pan halor ki madrassas.
Ki Chief Secretary jong ka Haryana, Andhra Pradesh, and Chhattisgarh ki la shah khot hajir ha ka 12 tarik mynta u bnai, katba jong ka Andaman and Nicobar Islands bad Goa ha ka 15 tarik, jong ka Jharkhand ha ka 16 tarik, jong ka Karnataka bad Kerala ha ka 17 tarik bad jong ka Madhya Pradesh, Meghalaya bad Telangana ha ka 18 tarik mynta u bnai.
