Pennsylvania, Kyllalyngkot:
Kawei ka longiing ka la pynpaw ia ka jingkyndit kaba khraw hadien ba lap ia u ksew uba la ktha kai haduh $4,000 (T. 3.32 lak) ka pisa kaba ki buh ha iing. Katei ka pisa ka dei ba katei ka longiing ka la buh kyrpang na ka bynta ki kam donkam ha u bnai ba la dep. Kumta la ong ba u Clayton bad ka Carrie Law ki la iathuh ba ki la ioh tam biang ia kitei ki lyngkhot pisa kiba la dep ktha da utei u ksew. Nalor jong kitei kiba u la dep ktha, ka pisa ba ki buh ka dang duna sa kumba $450. Hadien kata, ki la ialam ia utei u ksew sha ka jaka sumar mrad ban phah peit bniah ioh ka la don ka jing-ktah ia ka met jong u lada u la ioh kum nguid ia katei ka pisa kaba jah baroh hynrei ki doktor mrad ki iathuh ba kam shym don kano-kano ka jingktah ha ka met jong utei u ksew na katei ka jingjia.
La iathuh ba kitei ki shijur ki dang shu dep sei ia katei ka pisa na ka bynta ba kin siew sha ki kontraktor kiba pynshna ia ka kynroh iing. Pynban 30 minit lane kumba shiteng kynta hadien ba ki la dep sei bad wanrah ia katei ka song pisa ha iing, kaba sngewsih ka long ba ki shem pynban ba katei ka pisa ba ki la buh kyrpang ka la shah ktha lut ha utei u ksew uba ki ieid thep mynsiem bad ka kamra iing ba utei u ksew ka don, ka la satah bad saphriang da ki lyngkhot pisa suda.
La ong ba kane ka jingjia ka la jan pyniapler ia katei ka trai namar ba kim pat ju shem mynno-mynno ruh ba utei u ksew un dait ne ktha ia ki jingbuh- jingsat kiba don hapoh iing.
