Shillong, K’Lyngkot 05
Ïa ka jingrwai “Here We Play” la pyllait ha ka sngi Thohdieng na ka bynta ka 5th Meghalaya Games 2024 ka ban long ha Tura naduh 15 haduh 20 tarik mynta u bnai.
Ïa kane ka jingrwai la rwai ha ka ktien Khasi, Garo bad Jaiñtia da ka kynhun nongrwai ban paw ka nongbah Shillong, ka Summersalt lem bad ka Nokpante kaba na Tura.
Ha kane ka lympung yn wan ïashim bynta palat 3000 ngut ki nongïalehkai ha ki 19 tylli ki jait jingïalehkai, kynthup ïa lai tylli ki jingïalehkai tynrai.
Na ka liang u Myntri Rangbah ka Jylla u Conrad K. Sangma u la ong,”Kane ka jingrwai ‘Here We Go’ kan wanrah ka jingïatylli, ka bym don ka jingïasngewpher bad ka mynsiem kaba don kum ki nongshong shnong ka Jylla. Ai ba kane kan sawa lyngba ki stadium, ka ban ai mynsiem ïa ki nongïalehkai bad ruh ka ban pynsah jingkynmaw ha baroh ki nongïashim bynta bad ruh ïa ki ban sakhi ïa ka Meghalaya Games.”
Kumjuh u Myntri ka tnat ïalehkai u Bah Shakliar Warjri haba pyllait ïa kane ka jingwrai u la ong, “Kane ka jingrwai kan wanrah ka jingïatylli, ka mynsiem ïalehkai ha ka Meghalaya Games. Kane ka dei lyngba ka jingïohi jngai u Myntri Rangbah na ka bynta ban ïalong lang kawei bad ruh ka jingsarong halor ki jing-riewspah ki kolshor tynrai. Nga ai khublei ïa manla iwei pa iwei kiba don ïa ki sap ba kyrpang, kumjuh ïa ka Summersalt bad ka Nokpante, kiba la noh synñiang na ka bynta ban thaw ïa kane ka jingrwai ka ban pynsawa ha ki tyndong shkor jong ki samla bad ba kin don ïa ka mynsiem kum ki nongïalehkai.”
Ïa ki kyntien jong kane ka jingrwai la thaw da u Bah Kit Shangpliang jong ka Summersalt, ryngkat u Mikhael Marak na ka Nokpante, katba ïa ka jingtem sur la pynwan dur da u Bah Augustine Kurbah.
