Srinagar, K’lyngkot:
Ka jingïasiat kaba mar kylliang ka la jia hapdeng ki shipai ïada ri bad ki lehnoh ha Shopian distrik ha Jammu & Kashmir ha ka step jong ka sngi Thohdieng, la ïathuh ki pulit. Ka jingpyntreikam ha kaba ïadei bad ka jingïakhun pyrshah ïa ki lehnoh, haduh ba la thoh ïa ka khubor ka dang ïai bteng ha ka thaiñ Chotigam jong ka Shopian distrik, ha kaba la ïatreilang hapdeng ki pulit ka thaiñ, ki Army bad ki CRPF.
Ki pulit jong ka Kashmir Police Zone ha ka jingpyllait khubor lyngba ka X ki la ong, “Ka jingïasiat kaba markylliang ka la sdang ha ka thaiñ Chotigam jong ka Shopian distrik. Ki pulit jong ka Shopian, ki Army bad ki CRPF ki dang don bynta ha ka jingpyntreikam. “
Kane ka dei ka jingjia ha ka sien kaba ar jong ka jingïasiat kaba markylliang ha ka bynta ba shaphang Shathie jong ka Kashmir ha ki arsngi ba la leit. Ka jingïasiat kaba markylliang ka la jia ruh ha ka miet jong ka sngi Balang ha ka shnong Hadigam Kulgam haba ka kynhun shipai ba la ïatreilang ka la pynlong ïa ka jingleit khynra lehnoh. La ngeit ba ki lehnoh ki la ïoh phet na ka thaiñ ba la suba ba ki don kata na ka shnong Kulgam ha ka por ba la don ka jingïasiat kaba markylliang.
