Shillong, K’Lyngkot 05
Kham ñiar ban lap ba ki ‘riew paidbah kin mih shakhmat ban pynlut hi ïa ka spah ka phew khlem da donkam ka jingïarap na ka Sorkar. Pynban ar ngut ki samla rangbah kata u Bah World Champion Paliar bad Bah Stevenson Khongtyngkut ki la pynlut hi na ka pla lajong haduh T.65 lak ka pisa ban shna ïa ka madan futsal ha Lumpyngrope kaba ïaid na Mawlai Nongkwar Lummawnei ka surok na lad Banalari World Car.
Ïa kane ka madan futsal la plie pyrda ha ka sngi Palei da u Bah Brightstarwell Marbaniang uba dei u MLA ka Mawlai constituency.
Ïa kane ka madan la ker da ka jar baroh sawdong khnang ba ka bol kan nym lait sharud bad ki samla ki lah ban ïalehkai haduh mynmiet namar la buh ruh da ki bording.
Haba ai jingkren kum u kong -san, u MLA ka VPP na Mawlai Constituency Bah Brightstarwell u la ong ba ka jingngop ki samla ha u drok ha kine ki sngi ba mynta ka lah ban dei namar ka jingduna ki jaka kilanmet ha ki shnong ki thaw namar ka Mawlai ka dei ka shnong kaba heh ïa ka sor Shillong, hynrei ki duna palat ki jaka kilanmet.
Kum ka dak ka jingplie ïa kane ka madan futsal u Bah Brightstarwell u la kynjat ïa ka bol ha ka jingïadonlang ki ‘riew rangbah.
