Seoul, Kyllalyngkot:
Ka North Korea ha ka Sngi Thohdieng ka la ther palat 200 tylli ki ‘namding sha artylli ki bynta dew lynnong jong ka South Korea. Kane ka la pynkyndit ia ka South Korea ha katei ka step bad ka tnat iada ri jong katei ka ri ka la pynbna ia ka jingpynkhreh ioh lehse ka North Korea ka la thmu ban hiar thma ia ka South Korea ha kane ka por. Da ka jingleh ka North Korea da kumtei ka la pynthut ia ka shong suk shong saiñ bad buh jingma ia ki paidbah nongshong shnong ka South Korea ha katei ka sngi.
Namarkata, ki bor pyniaid ka South Korea ha katei ka Sngi Thohdieng ki la phah mih kyrkieh ia ki paidbah nongshong shnong kiba don ha kitei 2 tylli ki dewlynnong jong ka South Korea. Ka dei ruh ka sien kaba nyngkong eh ia kitei 2 tylli ki ri Korea ba kin iakynad para ma ki hadien ba ka North Korea ka la dep ther ‘namding teng sha South Korea ha u snem 2010.
Katei ka jingther bom lane ka jingther ‘namding jong ka North Korea ha kane ka kynti ka long hadien ba u nongialam ka North Korea- u Kim Jong Un u la dep pynbna bad byrngem lypa ba ka North Korea kan hiar thma pyrshah ia ka South Korea bad ka paralok ba iajan eh bad ka South Korea- ka United States.
Ha katei ka step Sngi Thohdieng, la ong ba ka North Korea ka la ther haduh palat 200 tylli ki ‘namding sha ki thaiñ jong KA Jangsan-got kaba don sha ka phang North jong ka Baengnyeong Island bad sha katei kajuh hi ka phang ba don ka Yeonpyeong Island.
Namar kata, ka South Korea ha katei ka sngi ka la maham pyrshah ia ka North Korea ba kam bit ban pynthud ia ka shongsuk- shongsaiñ hapoh ka ri bad ka la maham ruh ia ka North Korea ba ka dei ban shim ka jingkit khlieh halor katei ka jing pynjot ba ka la wanrah ia ka South Korea ha kane ka por.
Kumta, ki bor pyniaid jong ka dew lynnong Yeonpyeong ki la bthah ia ki paidbah ba kin kynriah noh na kitei ki thaiñ kiba ap jingma na ki kam thombor jong ka North Korea khnang ba kan long kaba suk ia ki bor pyniaid ka ri ba kin ai jingiada ia ki paidbah lajong wat lada ka thma kan khie ha kano- kano ka por ruh ka bym lah ban batai ne tip lypa.
Ka dew lynnong Yeonpyeong Island ka don ha ki bynta jong ka duriaw Yellow Sea. Kumba 80 Kilometre na ka phang West jong ka Incheon bad kumba 12 Kilometre na ka phang South jong ka thaiñ Hwanghae.
Kumjuh ruh ki bor pyniaid na ka dew lynnong Baengnyeong ki la phah kynriah noh ia ki paidbah nongshong shnong na katei ka jaka khnang ban lait na ki jingma jong ka thma kaba lah ban khie hapdeng ka North bad ka South Korea ha kane ka por.
Dang ha une u snem 2023 ba la leit, ka North Korea ka la sei-soh ha ka jingleit buh ia u kor Satellite uba ka pynbna ba u long u kor ‘Spy Satellite’ bad uba lah ban iohi lut ia ki rukom treikam bad ki jinglong-jingman jong ki ri ba marjan bad ka North Korea. Ka North Korea ka iathuh ruh ba ka la lah ban poi sha katei ka thong da ka jingiarap jong ka Russia ban pynïoh ia ki tiar bad ki jingdonkam baroh. Katba, ka North Korea ka siew kylliang pat da ki tiar iakhun thma sha ka Russia kum shi bynta ban pynphai ia ka jingleh bha jong ka Russia haba iadei bad ki tiar ne ki jingdonkam ha kaba shna bad pynbit – pynbiang ia utei u satellite jong ka.
